CV nədir və necə hazırlanmalıdır?
Elm & Texnologiya
07.05.2017
Farid Pardashunas
Salam.
Bu
gün sizə CV (ingiliscə Curriculum Vitae – Tərcümeyi-hal) barədə danışacam. Bu məqalə
xüsusilə CV hazırlamaqda çətinlik çəkən şəxslər üçün nəzərdə tutulub. Əgər
sizin professional və uğurlu CV`niz varsa, onda bu məqaləni burada saxlayıb,
buyurub saytımızdakı digər önəmli texnoloji yeniliklərlə tanış ola bilərsiniz.
P.S.
Bu məqalədə qeyd etdiklərim öz şəxsi təcrübəmə və araşdırmalarıma əsaslanır.
Beləliklə
davam edək. Gəlin, əvvəlcə CV nədir, nə üçün lazımdır və biz onu hansı məqsədlər
üçün istifadə edə bilərik suallarını aydınlaşdıraq. CV qısaca olaraq sizin tərcümeyi-halınızdır.
Yəni CV vasitəsilə siz özünüzü professional şəkildə ilk baxış üzrə təqdim edə
bilərsiniz. Deyək ki, hər hansı bir şirkət vakansiya elan edib və siz bu
vakansiyaya müraciət etmək istəyirsiniz. Bu zaman həmin şirkətin insan
resursları mütəxəssisinə özünüzü təqdim etmək üçün CV forması göndərməli
olacaqsınız. Bu ona sizin vakansiyaya uyğun olub olmadığınızı çatdıracaq və
ilkin baxışdan sonra sizin barənizdə onda bir fikir formalaşacaq. CV yazılma məqsədləri
müxtəlif ola bilər, buna təhsil, iş, təcrübə proqramları, konfrans və s. bir
çox səbəblər saymaq olar. Ünvanlanma obyektinə görə CV`lər fərqli ola bilər.
Amma bir çox hallarda ümumi hazırlanmış CV`ni istədiyiniz məqsəd üçün istifadə
edə bilərsiniz.
CV
hazırlayarkən aşağıdakı məlumatlara xüsusi diqqət yetirilməlidir:
- Ad, soyad, doğum tarixi, doğum yeri, ünvan, telefon nömrəsi, elektron poçt ünvanı – Bu məlumatların tam dəqiq və düzgün olmasına əmin olun. Çünki işə götürənin ilk baxdığı məlumatlar bunlar olur və burada yanlış hər bir məlumat sizin haqqınızda artıq mənfi rəyin formalaşmasına səbəb olur.
- Təhsil – Burada sizin sahib olduğunuz təhsil dərəcələriniz qeyd olunur. Şəxsi fikrimcə, burada bitirdiyiniz və ya hal-hazırda təhsil aldığınız universitet haqqında məlumatın olması daha vacibdir. Çünki insan resursları mütəxəssisləri və ya CV`nin ünvanlandığı şəxsləri məktəb təhsilindən çox ali təhsil maraqlandırır.
- İş təcrübəsi – Əgər varsa, iş təcrübələrinizi mütləq qeyd edin. Bu mütəxəssis insanın sizin barədə ümumi fikir formalaşmasına böyük ölçüdə təsir edir. Bununla o, sizin ona nə vəd etdiyinizi ilkin formada anlaya bilər. İş təcrübənizi qeyd edərkən, burada hansı vəzifənin sahibi olduğunuzu və gördüyünüz işləri qısa formada yazmaq olar. Məsələn, deyək ki, siz ABC firmasında "Layihə rəhbəri” vəzifəsində çalışmışınız. Bu zaman bir aşağı sətirdən bu vəzifədə gördüyünüz işlərdən ümumi yaza bilərsiniz, məsələn, "layihənin ümumi gedişatına nəzarət, büdcəyə nəzarət və tətbiqi, layihənin perspektivlərinin analizi” və s. Bu qeyd etdiyimi sadə bir nümunə idi. Bunu nə qədər professional yazmağınız sizdən asılıdır.
- Xüsusiyyətləriniz – Burada namizədin nə qədər "təchizatlı” olduğu önə çıxır. Burada siz xarici dil bilgiləriniz, kurs və ya seminarlar, nailiyyətləriniz, texnoloji bilikləriniz və əlavə nə ağlınıza gəlirsə istifadə edə bilərsiniz. Bu hissə sizinlə tərcümeyi-hala baxan arasında tam ümumi bir fikir formalaşmasına səbəb olur. Namizədin öz üzərində nə qədər işlədiyi, nələrə sahib olduğu və bunlardan potensial vakansiya üçün necə istifadə edəcəyi fikri yaranır.
- Sosial aktivliklər – Burada boş zamanınızı necə dəyərləndirdiyinizi qeyd edə bilərsiniz. Qeyd edim ki, məqsədinə görə bu hissəni əlavə etmək könüllüdür. Çünki bu hissədə yazacaqlarınız daha çox komanda şəraitində necə işləyə biləcəyiniz barədə kiçik fikir formalaşdırır. Məsələn, foto çəkmək, həvəskar aktyorluq və s.
CV yazarkən ən çox edilən səhvlər
CV,
ünvanlanan şəxsdə sizin barənizdə ilk formalaşmasına səbəb olan vasitədir. Əgər
tərcümeyi halınızı əl yazısı ilə təqdim edirsinizsə, bu zaman xəttinizin səliqəli
olmasına fikir verin. Əgər elektron formada təqdim edirsinizsə, bu zaman
yazınızın strukturunun səliqəli olmasına diqqət yetirin və heç bir çap xətasına
yol verməyin. İstifadə etdiyiniz söz və cümlələrin anlaşılan və axıcı olmasına
çalışın. Çünki istifadə etdiyiniz yazı üslubu işə götürənin fikrinə ciddi təsir
edir. İş verənin sizinlə bağlı bilmək istədiyi məlumatlara daha çox yer verin.
Məsələn, hansı məktəbi bitirdiyinizdən çox, hansı universiteti bitirdiyiniz və
hansı ixtisasa yiyələndiyiniz daha vacibdir.
Sahib
olduğunuz təcrübələr (iş, könüllülük) çox önəmli və əsas xətanın olduğu
bölümdür. Staj və ya professional işdə nələr etdiyiniz, hansı şirkətin hansı
departamentində vəzifəniz olduğu və vəzifəniz boyunca nə icra etdiyiniz çox önəmli
məlumatdır. Bu hissə namizədin işə nə qədər uyğun olduğunu təyin edən əsas
meyarlardandır. Çox yaxşı strukturda yazılmış təcrübə hissəsi sizi müsahibə mərhələsinə
1-0 öndə başlamağınıza səbəb olur.
Təcrübə
hissəsində məlumatların tam olaraq çatdırılmaması əsas problemlərdən biridir. Şirkətlərin
standartlarına uyğun bir işçi axtarışı zamanı ilk baxdıqları nöqtə iş təcrübəsi
olur və bu hissə tam dolğun olmalıdır, bütün önəmli məlumatlar yer almalıdır.
Məsələn,
deyək ki, namizəd ABC şirkətində "Departament müdiri” olaraq işlədiyini yazıb və
əlavə heç bir qeyd etməyib. Burada işəgötürən özünə lazım olan məlumatı əldə edə
bilmir. O bilmir ki, namizəd vəzifəsində nələr edib. İşəgötürən namizədin nə iş
gördüyünü, inkişafa necə təsir ediyini bilmək istəyir. Ona görə bu hissəsə
xüsusi diqqət yetirin.
Əgər
varsa, referanslar da önəmlidir. Bu sizə daha çox üstünlük verər. Yeni məzun
olmuş insanlar isə akademik referanslardan istifadə edə bilər. Referansların
kim tərəfindən yazılması da çox önəmlidir.
Tərcümeyi-halın
uzunluğuna gəldikdə isə çox qısa və ya uzun formalar bir standart xətasıdır. Çox
uzun CV formaları işəgötürənin sizin barənizdə gərəkli məlumatları almasına
mane olur. Çox qısa tərcümeyi-hallarda isə sizin haqqınızda dolğun məlumat əldə
etmir.
Tərcümeyi-hal
yazarkən istifadə etdiyiniz proqramlar və ya şablonlar da önəmlidir. Çalışın,
yaradıcı CV forması hazırlayın. Özünüzü bununla tərənnüm edin. İnternetdə bir
çox formalardan da istifadə edə bilərsiniz. Amma bu formaların arasından
professional olanları seçmək lazımdır. Məsələn, namizəd "moruq.net” saytının
qoyduğunu formanı doldurur, üzərindəki "Moruq.net” sözünü də silmir. Bu zaman
işəgötürən onun haqqında müsbət düşünə bilmir və şansı çox azalır.
Hal
hazırda Avropada bir çox sahələrdə Europass CV formasından istifadə edilir. Ölkəmizdə də kifayət qədər istifadəçisi olan platformanın istifadəsi də çox sadədir. Həmin sayta buradan daxil ola bilərsiniz. Yuxarıda qeyd etdiyim ardıcıllıqda CV forması hazırlamağınıza şərait yaradır. Təbii ki, mükəmməl CV hazırlama platforması deyil. Bundan başqa bir çox ödənişli servislər də vardır ki, onlar sizə mükəmməl dizaynlı CV formaları təqdim edir. Onların sayı çox olduğundan Google axtarış sistemindən özünüzə uyğun formasını tapıb CV hazırlaya bilərsiniz.
Linki kopyala
Bənzər xəbərlər
Oxşar xəbərlər
Həftənin xəbərləri
YouTube öz yeni dizaynını test etməyə başlayıb
Telegram-ın yaradıcısı Pavel Durov geniş müsahibə verib (VİDEO)