Wolverine haqqında son film "Logan" (İCMAL)
Digər
07.05.2017
Farid Pardashunas
Bir çoxları bilməsə də əslində Hugh Jackman, Wolverine roluna ilk dəfədən qəbul olunmayıb. 2000-ci ildə böyük ekranlara çıxmış "X-Men”
filmi üzərində işlər gedən zaman bu rola namizəd bir neçə aktyor var idi. Lakin
onların hamısı roldan imtina edəndən sonra Wolverine roluna məhz Hugh Jackman
qoşulmuşdu. Bu qərar bəlkə də aktyor kastinqi tarixində ən uğurlularından
biridir. Çünki bir çoxları (əsasən də komiks oxuyanlar) bilir ki, X-Men barədə
olan komikslərdə sözügedən personaj heçdə filmdə olduğu tərzdə deyil. Buna
baxmayaraq 2000-ci ildə təqdim edilmiş ilk X-Men filmində Hugh Jackman-ın
canlandırdığı obraz həm adi izləyicilərin həmdə komikslərlə maraqlanan
insanların rəğbətini qazanmışdı. Tez bir zamanda aktyor, sözügedən film
seriyasının əsas simasına çevrilmişdi. Hətta komikslərlə maraqlanmayan
insanlardan X-Men barədə soruşanda onların yadına ilk öncə 3 iti ülgücə sahib
personaj düşürdü. Müstəsnasız bu rol Hugh Jackman-a böyük şöhrət gətirdi və bu
17 il ərzində o, Wolverine obrazını bütün X-Men filmlərində canlandıraraq bütün
insanların sevgisini qazandı. O bu rol üçün etalon aktyor hesab edilir. Yəni
digər bir aktyorun məhz bu rolu canlandıracağına inanmaq mümkünsüzdür. Lakin
reallıq bundan ibarətdir ki, yaxşı olan hər şey gec-tez bitir. Təbii ki, Hugh
Jackman bu rolu həyatının sonuna kimi canlandıra bilməzdi. Bu nə vaxtsa olmalı
idi. "Logan” filmi bu məşhur personajın son hekayəsini əks etdirən və Hugh
Jackman-ın bu rolu sonuncu dəfə canlandırdığı uğurlu layihədir.
Mutantlar artıq yoxdurlar. Uzun bir ömür sürmüş və həyatının
yalnız acılardan ibarət olduğu Logan, Charles (Professor Xavier) ilə birlikdə
Amerikanın çöllüyündə yaşamaq məcburiyyətində qalırlar. Lakin günlərin birində
peyda olan Laura adlı balaca qız hər şeyi dəyişir və onlar 3-ü, təhlükəli macəraya
yollanırlar. İlk öncə onu demək lazımdır ki, bu film komiks üzrə olsa belə digər
komiks filmlərdən çox fərqlənir. Ona görə ki, müəyyən mənada film ilk öncə dram
janrlı hesab olunur. Filmi izləyən zaman personajlara acımamaq və onlara görə
nigaran qalmamaq mümkün deyil. Hətta ilk trailerdən belə hiss olunurdu ki, "Logan”, ağır bir film
olacaq. Bəli o həqiqətən də ağır aurada çəkilib. Logan onsuzda öz həyatı
boyunca yaxşı nəsə yaşamayıb. Ona yaxın olan insanların gec-tez öz həyatlarını
itirməsinin günahını özündə görən Logan bu ağır yük ilə yaşayır. Personajların
üzlərində bəzən gülüşün əks olunmasına baxmayaraq izləyici daxilən kədər hissi
keçirdir. Çünki o hiss edir ki, bu macəranın sonunda yaxşı heçnə baş verməyəcək.
Ayrıca olaraq aktyorlara böyük hörmət düşür. Belə ki, Hugh Jackman və Patrick Stewart maksimal dərəcədə bu rollara öz güclərini sərf ediblər. Onlar bilirdilər ki, bu
film son olacaq və başa düşürdülər ki, məhz bu filmdə bütün emosiyaları və
personajların yaşadıqları ağır həyatı maksimal dərəcədə canlandırmalıdırlar.
Onlar bunun öhdəsindən çox əla gəliblər. Bundan əlavə olaraq X-23 mutant
obrazını canlandırmış azyaşlı aktrisa Dafne Keen-i də qeyd etmək lazımdır. Belə
kiçik yaşda Logan xasiyyətli bir obrazı canlandırmaq tapşırığından uğurla
keçib. Qeyd etmək lazımdır ki, filmdə fan servis çox yaxşı səviyyədə
reallaşdırılıb. Yəni komikslərlə yaxından tanış olan izləyicilər, onlara doğma olan anlarla qarşılaşacaqlar. Filmin 18+ reytinq üzərinə çəkilməsi onu daha cəlbedici
edir. Əgər xatırlayırsınızsa bundan əvvəlki filmlərdə Wolverine olan anlarda zorakılıq
səhnələri müəyyən sərhədə malik idi. Lakin "Logan”da biz, baş personaj tərəfindən
vəhşicəsinə öldürülən insanları görürük. Yəni zorakılıq dərəcəsi, 18+ reytinqi ənənəsinə
sadiq qalıb. Əslində bu qərarın verilməsinə "Deadpool” filminin uğuru təsir
etdi. Belə ki, o film də 18+ reytinq üzərində çəkilmişdi və izləyicilərin rəğbətini
qazanmışdı.
Mənim fikrimcə bu filmin bir mənfi tərəfi var. Şəxsən mənim komikslərə marağım olsa belə mən onları oxumuram və buna görədə filmdə baş personajların bu vəziyyətə
necə düşdükləri digər mutantlarla nələrin olduqlarını anlamaq çətin oldu. Çünki
filmdə bu barədə heç bir məlumat
verilmir. Filmi izləyən zaman sanki bu personajların ümumilikdə X-Men komikslərinə
aid olmadıqları hissi yaranır. İstər-istəməz keçmiş filmlərdəki personajların aqibətinin necə olduğunu bilmək istəyirsən.
Bu baxımdan komikslərlə yaxından maraqlanmayan insanlar üçün filmdə bəzi şeylər
anlaşılmaz şəkildə qala bilər. Bu mənim film barədə fikirlərimi biraz aşağı
saldı. Lakin buna baxmayaraq "Logan”a baxmamaq olmaz. Ən əfsus da əgər bu illər
ərzində həmin baş qəhrəmanları sevmisənsə və onlara müəyyən mənada simpatiya bəsləyirsənsə
mütləq bu filmə baxmaq lazımdır. Son olaraq qeyd etmək lazımdır ki, "Logan”, bir tarixin sona çatması
deməkdir. "Logan”ı izləyəndən sonra sanki daxildən boşluq hiss edirsən.
Sanki çox yaxın bir dostunu itirmisən. 17 il ərzində insanların sevgisini və rəğbətini qazanmış aktyorun
canlandırdığı personajın son hekayəsini bundan yaxşı yekunlaşdırmaq olmazdı.
Biz istənilən vaxt bu filmlərə qayıda bilərik. Biz həmişə onları yenidən təkrar-təkrar
izləyə bilərik. Lakin sözügedən aktyorların iştirakı ilə bir daha bu cür layihələrin
olmayacağını anlamaq insanı çox kədərləndirir. İnsanlar onu vəhşi heyvana
çevirdilər. Lakin balaca bir qız sonda onu insan etdi.
Linki kopyala
Bənzər xəbərlər
Oxşar xəbərlər
Həftənin xəbərləri
YouTube öz yeni dizaynını test etməyə başlayıb
Telegram-ın yaradıcısı Pavel Durov geniş müsahibə verib (VİDEO)