main-post-cover

    Google şirkəti Meta və Apple məhsulları ilə rəqabət apara biləcək AR cihaz üzərində çalışır

    Elm & Texnologiya
    21.01.2022
    Emil Nəcəfov
        Virtual (VR) və artırılmış (AR) reallıq cihazları bazarı daha çox şirkətin diqqətini cəlb etməyə davam edir. Məlumata əsasən Meta Oculus HTC Vive kimi məhsullarla təkcə Apple şirkəti özünün qarışıq reallıq (AR + VR) cihazı ilə rəqabət aparmayacaq. Belə ki, bir neçə müddət bundan öncə Google şirkəti də özünün AR cihazı üzərində işlərə start verib. Şirkətin AR cihazı üzrə layihəsinin kod adı Project Iris-dir. Google onu 2024-cü ildə satışa çıxarda bilər. Meta ilə Apple şirkətlərinin yaxın gələcəkdəki cihazları kimi Google şirkətinin AR cihazı da xarici kameralar ilə təchiz olunacaq. Həmin kameralar real dünyanın təsvirlərini əldə etməyə imkan verəcəklər. Daha sonrakı mərhələdə AR cihazın sistemi həmin təsvirləri kompüter qrafikası ilə birləşdirəcək.
        Məlumatda qeyd edilib ki, Google şirkətinin AR cihazının ilk prototipi xarici görünüşcə xizək eynəklərini xatırladır və onu hansısa kənar cihaza qoşmaq lazım deyil. Belə ki, AR cihaz avtonom rejimdə çalışa bilir. Məlumata əsasən Google şirkətinin AR cihazı hələ ilkin hazırlanma mərhələsindədir və bazarda satışa çıxmaq üzrə dəqiq təyin edilmiş strategiyaya sahib deyil. Cihaz Google şirkətinin Tensor adlı fərdi prosessoru vasitəsilə çalışacaq. Cihazın hal hazırki versiyası Android əməliyyat sistemi ilə çalışır. Lakin mövcud məlumatlara əsasən Google AR cihaz üçün nəzərdə tutulmuş xüsusi əməliyyat sistemi üzərində çalışır. Project Iris yüksək performans gücünə sahib olmayacaq. Buna görə də cihazdakı qrafik renderinq prosesinin uzaqdan reallaşdırılması üçün Google özünün data mərkəzlərindən istifadə etmək niyyətindədir.
        Məlumatda qeyd edilib ki, AR cihaz üzərində Pixel komandası çalışır. Lakin nəticədə cihazın bu brend altında satışa çıxıb-çıxmayacağı bilinmir. Qeyd etmək lazımdır ki, 2012-ci ildə Google özünün Google Glass adlı smart eynəyini təqdim etməklə səs-küy yaratmışdı. Lakin sözügedən eynək həmin vaxtda öz zamanını qabaqladığı üçün kommersiya uğuruna imza ata bilməmişdi. Project Iris isə şirkətin bu sahəyə geri dönüşü üçün nəzərdə tutulub. Məlumata əsasən Project Iris üzərində 300 nəfər insan çalışır və Google bu layihəyə əlavə bir neçə yüz nəfər insanı cəlb etməyi planlaşdırır. Layihənin icraçı direktoru qismində Clay Bavor çıxış edir və o, birbaşa şirkətin CEO-su Sundar Pichai-yə tabedir. 
    Linki kopyala