Günlər keçdikcə AB-nin daxili yanma mühərriklərinə qoyduğu qadağaya qarşı səslər artmağa başlayıb. Gələn məlumatlara görə, Avropa Parlamentinin ən böyük siyasi qrupu olan Avropa Xalq Partiyası, Brüsseldəki səlahiyyətlilərə bu qərarı dəyişdirmək üçün təzyiq göstərir. Reuters-in xəbərinə əsasən, ortaya çıxan bir layihə sənədində bu qərarın geri alınmasının vacib olduğu vurğulanır.

     Avropa Xalq Partiyası, daxili yanma mühərriklərinin 2035-ci ildən sonra alternativ yanacaqlarla işləyən nəqliyyat vasitələrində fəaliyyətini davam etdirməsini istəyir. Bundan əlavə, sənəddə istehsalçılara 2035-ci ildən sonra da şarj edilə bilən hibrid avtomobilləri satmağa icazə verilməli olduğu ifadə edilir. Bildiyiniz kimi, Avropada istehsalçılar azalan tələbat səbəbindən elektrikli avtomobil planlarını təxirə salmağa və keçid dövrü olaraq qəbul edilən hibrid avtomobillərə yönəlməyə başlayıblar. EPP, həmçinin gələn il qüvvəyə minəcək daha sərt emissiya tənzimləmələrinin 2027-ci ilə qədər təxirə salınmasını, bununla da şirkətlərin cərimələrdən qorunmasını tələb edir. Gələn il tətbiq ediləcək qərara əsasən, WLTP dövrünə uyğun hazırkı karbon emissiya ortalaması olan 115.1 q/km hədəfi 19% azaldılaraq 93.6 q/km-ə düşəcək.

     Avtomobil istehsalçıları, karbon emissiya hədəfini aşan hər bir qram üçün 95 avro cərimə ödəyir. Bu cərimə hər bir avtomobil üçün tətbiq edildiyindən, Volkswagen Group kimi böyük şirkətlər üçün sürətlə artan maliyyə yükü halına gəlir. Renault-un CEO-su Luca de Meo, hesablamalarına əsasən, sənayenin gələn il yalnız emissiya cərimələrinə görə, 15 milyard avro ödəyə biləcəyini deyir. EPP, yeni təyin olunan Avropa Komissiyasında təsirli bir rola sahibdir. Komissiya sədri Ursula von der Leyen də daxil olmaqla, 27 üzvün əksəriyyəti bu qrupa daxildir.