Adobe ABŞ-də abunəliyin ləğvini çətinləşdirdiyi iddialarına görə 75 milyon dollar ödəməyə razılaşdı

    Technote.az “The Verge” platformasına istinadən bildirir ki, ABŞ hökumətinin açdığı məhkəmə işi nəticəsində Adobe istehlakçıların abunəliyi ləğv etməsini qəsdən çətinləşdirdiyi və əlavə ödənişləri gizlətdiyi iddiaları ilə bağlı 75 milyon dollar ödəməyə razılaşıb.

    Məsələ ilk dəfə 2024-cü ilin iyununda gündəmə gəlmişdi. United States Department of Justice şirkəti istehlakçıların hüquqlarını qoruyan federal qanunları pozmaqda ittiham edirdi. İddialara görə, Adobe özünün “illik, aylıq ödənişli” planlarında vacib şərtləri açıq şəkildə göstərməyib və istifadəçilərin abunəliyi ləğv etməsi üçün çox mürəkkəb və uzun proses yaradıb.

    Şikayətdə qeyd olunurdu ki, abunəliyi dayandırmaq istəyən istifadəçilər proses zamanı gözlənilməz erkən ləğv cərimələri ilə qarşılaşırdılar. Adobe isə ittihamları qəbul etmir. Şirkət bildirib ki, son illərdə abunə şərtlərinin açıqlığı və ləğv prosedurları daha da şəffaf hala gətirilib.

    Bu hadisə eyni zamanda şirkətdə rəhbərlik dəyişiklikləri fonunda baş verir. Uzun illərdir Adobe-un baş direktoru olan Shantanu Narayen artıq 18 ildən sonra vəzifədən ayrılmağı planlaşdırdığını açıqlayıb. Şirkətin birdəfəlik proqram satış modelindən abunə sisteminə keçidi də məhz onun rəhbərliyi dövründə həyata keçirilmişdi. Məhkəmə indi Adobe-un təklif etdiyi razılaşmanın qəbul edilib-edilməyəcəyinə qərar verəcək.