Alibaba sürətli çatdırılma uğrunda mübarizəni gücləndirir

 

    Alibaba Group ölkənin son müstəqil onlayn ərzaq çatdırılma platformalarından biri olan Pupu şirkətini almaq üçün 1,5 milyard dollar dəyərində təklif irəli sürüb. Bloomberg-in məlumatına görə, bu məbləğ daha əvvəl Sun Art Retail tərəfindən verilən 600 milyon dollarlıq təklifdən iki dəfədən çox yüksəkdir. Bu addım Çində sürətlə böyüyən ani çatdırılma bazarında rəqabətin daha da qızışdığını göstərir. Bir neçə ay əvvəl Meituan da rəqibi Dingdong Fresh-in Çin biznesini 717 milyon dollara almaq barədə razılığa gəlmişdi.

    Pupu hazırda Fujian, Guangdong, Sichuan və Hubei daxil olmaqla təxminən 10 şəhərdə 30 dəqiqəlik çatdırılma xidməti təqdim edir. Şirkətin illik dövriyyəsinin 30 milyard yuanı keçdiyi bildirilir. Platforma təzə ərzaq məhsulları, gündəlik tələbat malları və digər sürətli istehlak məhsullarını yerli anbarlar vasitəsilə müştərilərə çatdırır. Alibaba üçün Pupu-nun alınması illərlə qurulması tələb olunan anbar şəbəkəsi, təchizatçılar və soyuq logistika infrastrukturuna qısa yoldan sahib olmaq deməkdir.

    Alibaba, Meituan və JD.com son bir ildə qida çatdırılması və ani pərakəndə satış bazarında üstünlük qazanmaq üçün böyük məbləğdə subsidiyalar ayırıblar. Məlumatlara görə, bu məqsədlə ümumilikdə ən azı 150 milyard yuan xərclənib. Bu mübarizə nəticəsində gündəlik sifarişlərin sayı 80-90 milyon səviyyəsindən 200 milyonu keçib. Lakin şirkətlər bazar payını artırmaq naminə hər sifarişdə zərərə işləməyə davam ediblər.