Anbernic 2 ekranlı RG DDS oyun cihazı üçün 510 manat qiymət açıqladı

    “Anbernic” 2 ekranlı yeni əl oyun cihazı “RG DDS” modelinin qiymətini və satış tarixini açıqlayıb. Cihaz 299,99 dollara (təxminən 510 manat) satılacaq. İlkin sifariş zamanı qiymət müvəqqəti olaraq 284,99 dollar (təxminən 480 manat) olacaq. Bu məbləğ ilk “Nintendo 3DS” modelinin satış qiymətindən təxminən 2 dəfə yüksəkdir. Çatdırılma dekabrda başlayacaq.

    “RG DDS” modelində “Snapdragon G2 Gen 2” prosessoru var. Cihaz emulyator adlanan proqramlarla müxtəlif platformalar üçün hazırlanmış oyunları aça biləcək. Modelin 8 GB RAM və 128 GB yaddaşlı versiyası hazırlanıb. Digər versiyada 12 GB RAM və 256 GB yaddaş var. Hər iki variantda microSD kart yuvası olduğuna görə yaddaşı 2 TB-a qədər artırmaq olar.

    Cihaz “Android 16” əməliyyat sistemi ilə işləyəcək. İstifadəçilər müxtəlif emulyator tətbiqləri quraşdıra biləcəklər. Simsiz bağlantı üçün Wi-Fi 6 və Bluetooth 5.4 var. Görüntünü 1080p keyfiyyətində xarici ekrana ötürmək də olur. 6 oxlu giroskop cihazın hərəkətini müəyyənləşdirir, qulaqlıq üçün isə 3,5 mm giriş qoyulub.

    “RG DDS” modelində yüksək təsvir ölçülü 2 ekran var. Ancaq ilk “Nintendo 3DS” cihazında olan eynəksiz 3D effekti burada işləməyəcək. Şirkətin məlumatına görə, korpusdakı AI düyməsi süni intellekt funksiyalarını açacaq. Bu funksiyalar oyun bələdçiləri və strategiyalar göstərəcək, həmçinin oyun zamanı məzmunu dərhal tərcümə edəcək.

    “Anbernic” çatdırılmaya 10 dekabr 2026-cı ildən mərhələli şəkildə başlayacaq. Cihaz “Glacier White”, “Basalt Black” və “Phantom Blue” rənglərində buraxılacaq.