Apple-ın ən güclü rəhbərlərindən biri şirkətdən ayrılmağa hazırlaşır

    Bloomberg-in məlumatına görə, Apple-ın Hardware Technologies bölməsinin baş vitse-prezidenti, şirkətin ən vacib adlarından biri olan Johny Srouji yaxın vaxtlarda Apple-dan ayrılmağı ciddi şəkildə nəzərdən keçirir. Məlumata əsasən, Srouji bu barədə artıq Tim Cook-a da məlumat verib.

    Əgər Srouji ayrılarsa, bu, Apple-ın yüksək rəhbər heyətində son aylarda baş verən böyük dəyişikliklərin davamı olacaq. Bu il iyulda şirkətin COO-su Jeff Williams təqaüdə çıxacağını açıqlamış və rəhbərlikdə ciddi struktur dəyişikliklərinə səbəb olmuşdu. Dekabr ayında isə bu proses daha da sürətləndi:

• Apple-ın süni intellekt rəhbəri John Giannandrea vəzifədən ayrıldı.

• Lisa Jackson və baş hüquq müşaviri Kate Adams təqaüdə çıxacaqlarını bildirdilər

• UI dizayn komandasında illərdir çalışan Alan Dye isə Meta-ya keçdi.

    Bu səviyyədə ardıcıl rəhbər itkiləri Apple kimi sabitliyi ilə tanınan bir şirkət üçün son dərəcə qeyri-adi hal hesab olunur.