Apple-ın təsis sənədi hərraca çıxarılır!

    Technote.az "Engadget" platformasına istinadən bildirir ki, Apple Computer Company-nin 1976-cı ildə yaradılmasını rəsmiləşdirən üç səhifəlik təsis sənədi növbəti il hərraca çıxarılır. Sənədin 2–4 milyon dollar arasında dəyər qazandığı bildirilir.

    Apple Insider-in məlumatına görə, sənəd Christie’s hərrac evinin 2026-cı ilin əvvəlində Nyu-Yorkda keçirəcəyi “We the People: America at 250” adlı hərracda satışa çıxarılacaq. Sənəddə Steve Jobs, Steve Wozniak və Ron Wayne-in imzaları yer alır və həmin dövrdə şirkətdəki pay bölgüləri göstərilir. Bu sənəd tarixi baxımdan çox önəmli olsa da, Apple-ın ilkin ortaqlıq razılaşması uzun sürməyib. Şirkət Apple Computer, Inc adını aldıqdan qısa müddət sonra Ron Wayne öz 10 faiz payını Jobs və Wozniak-a geri sataraq şirkəti tərk edib. O, Apple-ın yaradılmasından cəmi iki həftə sonra şirkətdən ayrılıb.

    Ron Wayne 2016-cı ildə BBC-yə müsahibəsində bu qərara görə peşman olmadığını desə də, həmin 10 faiz payın o dövrdə təxminən 60 milyard dollar dəyərində olacağı bildirilirdi. O isə bütün hüquqlarını cəmi 1.500 dollara təhvil vermişdi. Üstəlik, Wayne öz nüsxəsini də illər əvvəl cəmi 500 dollara satıb ki, bu addımı sonradan peşmanlıqla xatırladığını deyib.

    Hərraca çıxarılan sənəd 2–4 milyon dollar arasında qiymətləndirilir. Bu, Apple tarixi ilə bağlı satılan ilk əhəmiyyətli əşya deyil. 2023-cü ildə birinci nəsil, açılmamış iPhone 190.000 dollara satılmışdı. Bu, cihazın ilkin satış qiymətindən təxminən 300 dəfə çoxdur.