Apple Producers Guild Awards-da 7 nominasiya qazandı

    Technote.az “Apple Insider” platformasına istinadən bildirir ki, Apple 2026-cı il mükafat mövsümünə uğurlu start verərək 37-ci Producers Guild Awards mərasimində yeddi nominasiya qazanıb. Namizədlər siyahısı cümə günü açıqlanıb və Apple TV+ platformasına məxsus layihələr altı fərqli kateqoriya üzrə diqqət çəkib.

    Ən önəmli nominasiya F1 filminə aiddir. Film kinoteatr buraxılışları üçün təqdim olunan Darryl F. Zanuck Award for Outstanding Producer of Theatrical Motion Pictures mükafatı uğrunda mübarizə aparacaq. Televiziya kateqoriyalarında isə The Studio komediya serialı kimi Danny Thomas Award for Outstanding Producer of Episodic Television – Comedy nominasiyasında yer alıb. The Gorge isə yayımlanan və ya striminq üçün istehsal olunmuş filmlər kateqoriyasında namizəddir. Dram serialları üzrə ən diqqətçəkən məqam odur ki, Pluribus və Severance eyni kateqoriyada Norman Felton Award for Outstanding Producer of Episodic Television – Drama mükafatı üçün yarışır.

    Siyahını tamamlayan digər layihələr arasında sənədli janrda Mr. Scorsese, uşaq proqramları kateqoriyasında isə Snoopy Presents: A Summer Musical yer alır. Mükafatların qalibləri 28 fevral tarixində Los-Ancelesdə keçiriləcək rəsmi mərasimdə açıqlanacaq.