Apple TV “The Hunt” serialını plagiat iddialarına görə yayımdan çıxarıb

    Technote.az "The Verge" platformasına istinadən bildirir ki, Apple TV ötən həftə “The Hunt” adlı yeni fransız serialını yayımlama planından geri çəkilib. Buna səbəb əsərin plagiat iddiaları ilə gündəmə gəlməsidir. İlk olaraq Apple Insider tərəfindən bildirilən məlumata görə, media jurnalisti Clement Garin serialın süjetinin Douglas Fairbairn tərəfindən 1974-cü ildə yazılmış “Shoot” adlı romanla son dərəcə oxşar olduğunu iddia edib.

    Serialın 3 dekabrda Apple TV-də nümayişi nəzərdə tutulurdu, lakin layihənin istehsalçısı olan Gaumont məsələ ilə bağlı rəsmi açıqlama verərək yayımlanmanın müvəqqəti dayandırıldığını təsdiqləyib. Şirkət Variety-yə açıqlamasında belə deyib: “’The Hunt’ serialının yayımı müvəqqəti olaraq təxirə salınıb. Hazırda istehsalımızla bağlı bütün sualları araşdırmaq üçün ətraflı daxili yoxlama aparırıq”.

    Serialın mövzusu Franck adlı qəhrəman və dostlarının ov zamanı digər bir ovçu dəstəsi ilə qarşılaşması və əsassız olaraq hədəfə alınması üzərində qurulub. Hadisələrdən sonra dostlar özlərini qorumaq üçün hücuma cavab verirlər və bir ovçunu təsadüfən vururlar. Qaçmağı bacarsalar da, hadisəni gizli saxlayırlar. Lakin növbəti günlərdə Franck və dostları izlənildiklərini hiss etməyə başlayır. Ovçuların intiqam üçün geri döndüyü ehtimalı serialın gərgin süjetini formalaşdırır.

    Digər tərəfdən, Fairbairn-in “Shoot” romanında da eyni motivlərə rast gəlinir. Kitab Kanadada ov zamanı rəqib ovçular tərəfindən hücuma məruz qalan Rex və dostlarının hekayəsini danışır. Orada da bir ovçu öldürülür və qəhrəmanlar polisə xəbər verməməyi üstün tuturlar. Daha sonra qatilin kimliyini araşdıran Rex rəqib ovçuların qisas üçün geri dönə biləcəyindən qorxaraq paranoyaya qapılır. Roman 1976-cı ildə filmə də adaptasiya olunub.

    Apple TV bu ilin əvvəlində Jessica Chastain-in baş rolda olduğu “The Savant” serialının nümayişini də plagiat və hüquqi məsələlərlə bağlı ehtiyat məqsədilə təxirə salmışdı. The Verge məsələ ilə bağlı Apple və Gaumont-a müraciət etsə də, hələlik cavab ala bilməyib.