Apple və həmkarlar ittifaqı arasında yeni mübahisə

    ABŞ Konqresinin 40 üzvü Apple CEO-su Tim Cooka ünvanladıqları məktubda şirkətin Merilend ştatındakı Towson mağazasını bağlamaq qərarını yenidən nəzərdən keçirməsini tələb ediblər. Söhbət Apple-ın tarixində ilk həmkarlar ittifaqı yaratmış pərakəndə satış nöqtəsi olan Apple Towson mağazasından gedir. Konqres üzvləri hesab edirlər ki, mağazanın bağlanması işçilərin həmkarlar ittifaqında birləşmək hüququnu qoruyan ABŞ Əmək Münasibətləri Haqqında Milli Qanunun (National Labor Relations Act) 7-ci maddəsinin pozulması kimi qiymətləndirilə bilər. Mağazanı təmsil edən Beynəlxalq Maşinistlər və Aerokosmik İşçilər Assosiasiyası (IAM Union) artıq aprel ayında Apple-a qarşı əmək qanunvericiliyinin pozulması ilə bağlı şikayət təqdim edib.

    Məktubda Apple-dan iki addımdan birini atmaq tələb olunur. Birinci variant şirkətin mağazanın fəaliyyətini davam etdirməsidir. Əgər mağaza bağlanacaqsa, ikinci tələb işçilərin yaxınlıqdakı digər Apple mağazalarına yenidən müraciət etmədən köçürülməsinə imkan yaradılmasıdır. Apple isə bildirir ki, şirkət həmkarlar ittifaqı ilə imzalanmış müqavilənin bütün şərtlərinə əməl edəcək. Müqaviləyə əsasən işçilərə kompensasiya ödəniləcək və gələcəkdə Towson ətrafında 50 mil radiusunda yeni Apple mağazası açılarsa, həmin işçilərə ilk iş təklifi hüququ veriləcək.