Berlin mərkəzli Moss 1 milyard avro dəyərə çatdı

    Almaniyanın Berlin şəhərində fəaliyyət göstərən maliyyə texnologiyaları (fintech) şirkəti Moss yeni investisiya turunda 30 milyon avro cəlb edib. Series C investisiya mərhələsindən sonra şirkətin bazar dəyəri 1 milyard avronu keçərək "unicorn" statusu qazanıb. İnvestisiya turuna fintech sahəsində ixtisaslaşmış Portage fondu rəhbərlik edib. Şirkətin əvvəlki investorlarından olan Cherry Ventures da bu raundda iştirak edərək Moss-a dəstəyini davam etdirib.

    Moss kiçik və orta bizneslər üçün şirkət xərclərinin idarə olunmasını asanlaşdıran platforma təqdim edir. Xidmətə korporativ kartlar, fakturaların idarə edilməsi, əməkdaş xərclərinin geri ödənilməsi, real vaxt büdcə nəzarəti, təsdiq prosesləri və avtomatik mühasibat uçotu kimi funksiyalar daxildir. Hazırda Moss Almaniya, Böyük Britaniya, Niderland və Avstriyada 5 mindən çox şirkətə xidmət göstərir. Şirkətin illik təkrarlanan gəliri (ARR) isə 70 milyon avronu ötüb.

    Şirkətin diqqətçəkən əsas istiqaməti isə süni intellektdir. Moss bildirir ki, platforması üzərindən ayda 2 milyondan çox maliyyə əməliyyatı AI agentləri vasitəsilə emal edilir. Bununla belə, şirkət tam avtomatlaşdırılmış sistemlərə deyil, insan nəzarəti altında işləyən və tənzimlənə bilən AI agentlərinə üstünlük verir.