Civilization VI rəsmi olaraq anons olundu

Biraz öncə 2K Games şirkəti rəsmi olaraq Civilization VI oyununu anons etdi. Oyun həmişəki kimi Firaxis Games studiyası tərəfindən hazırlanır. Anons olunmuş yeni oyunda oyunçular yenidən komandir rolunda çıxış edərək daş dövründən başlayaraq informasiya dövrünə kimi çox əsrlərlə qala biləcək və zamanın dəyişikliklərinə tab gətirə biləcək imperiya qurmalı olacaqlar. Studiyanın verdiyi məlumata əsasən Civilization VI yeni xüsusiyyətləri ilə keçmiş oyunlardan fərqlənəcək. Məsələn bu dəfə şəhərlər böyüyərək xəritədə daha çox yer tutacaqlar. Oyunçunun qəbul edəcəyi qərarlar isə sivilizasiyanın elmi tədqiqatlarına və mədəniyyat inkişafına öz təsirini göstərəcək. Yeni Civilization seriyanın veteran oyunçularına yeni xüsusiyyətlər və funksiyalar təqdim edərək onların könüllərini oxşayacaq. Seriya ilə tanış olacaq yeni oyunçulara isə yeni və rahat öyrədici mexanizm təqdim olunacaq. Onun köməyi ilə yeni oyunçular seriyanın əsas özəllikləri ilə rahatlıqla tanış ola biləcəklər. Bundan əlavə olaraq Civilization VI-da yaxşılaşdırılmış multiplayer rejimi, dinamik siyasət sistemi, döyüşlər üçün nəzərdə tutulmuş yeni funksiyalar, texnoloji və mədəni inkişafı planlaşdırmaq üçün aktiv tədqiqatlar sistemi olacaq. Civilization VI bu ilin 21 oktyabr tarixində PC üçün satışa çıxacaq.