David Ellison Warner Bros. Discovery-ni almaq üçün son tarixi uzatdı

    Technote.az “Engadget” platformasına istinadən bildirir ki, Paramount Skydance-in baş direktoru David Ellison Warner Bros. Discovery-ni almaq planından hələ də əl çəkməyib. Şirkət 108,4 milyard dollarlıq nağd alış təklifinin qəbul müddətini 20 fevral 2026-cı ilədək uzatdığını açıqlayıb. Əvvəlki təklifin müddəti 21 yanvarda başa çatsa da, davam edən məhkəmə prosesi və Netflix-in rəqib təklifi səbəbilə Paramount Skydance bu mübarizəni davam etdirmək istəyir.

    Xatırladaq ki, Netflix və Warner Bros. Discovery 2025-ci ilin dekabrında 82,7 milyard dollarlıq razılaşma elan etmişdi. Bu razılaşmaya əsasən Netflix, Warner Bros. film studiyaları, New Line Cinema, HBO, HBO Max, oyun studiyaları, tema parkları və TNT kimi bəzi kanalları alacaq. Lakin xəbərlər və reallıq-şouları birləşdirən “Global Networks” bölməsi bu satışa daxil deyil.

   Bundan bir neçə gün sonra Paramount Skydance, Warner Bros. Discovery-nin bütünlüklə alınmasını nəzərdə tutan 108,4 milyard dollarlıq təkliflə çıxış edib və səhmdarlara Netflix-in təklifini rədd etməyi tövsiyə edib. Şirkət həmçinin yanvar ayında Warner Bros. Discovery-ni məhkəməyə verərək, Netflix-in üstün tutulmasının səbəbləri barədə kifayət qədər məlumat verilmədiyini iddia edib.

    Paramount Skydance bildirir ki, onların təklifi daha yüksək məbləğli olmaqla yanaşı, tənzimləyici qurumlar tərəfindən təsdiqlənmə ehtimalı da daha realdır, çünki bu razılaşma Netflix-in bazar dominantlığını daha da gücləndirmir. Warner Bros. Discovery isə əksinə, Paramount-un maliyyə imkanlarının yetərli olmadığını və sövdələşməni tamamlayacağına dair şübhələrin olduğunu deyir.

    David Ellison daha əvvəl atası, milyarder Larry Ellison-un maliyyə dəstəyi və siyasi əlaqələri sayəsində Skydance və Paramount-un birləşməsini reallaşdırmışdı. CBS News-da “fikir müxtəlifliyi”ni qorumaq və DEI (müxtəliflik, bərabərlik və inklüzivlik) proqramları yaratmamaq vədləri FCC-nin təsdiqi üçün kifayət etmişdi. Lakin görünür, Warner Bros. Discovery-ni almaq Ellison üçün bu dəfə o qədər də asan olmayacaq.