Disney-in yeni CEO-su bəlli oldu

    Technote.az “The Verge” platformasına istinadən bildirir ki, Disney şirkəti uzunmüddətli baş icraçı direktoru Bob Iger üçün varis seçimini rəsmən elan edib. Şirkətin yaydığı məlumata görə, Disney-in əyləncə parkları və təcrübə biznesinə rəhbərlik edən Josh D’Amaro 18 mart 2026-cı il tarixindən etibarən CEO vəzifəsini icra edəcək.

    Bob Iger 15 il Disney-in baş direktoru olduqdan sonra 2020-ci ildə vəzifədən ayrılmış, lakin 2022-ci ildə Bob Chapek-in yerinə yenidən şirkətə qayıtmışdı. Onun 2026-cı ildə yenidən təqaüdə çıxacağı açıqlanandan sonra, potensial varis mövzusu uzun müddət müzakirə olunurdu. Bu prosesdə D’Amaro ilə yanaşı ESPN-in rəhbəri Cimmi Pitaro və Disney Entertainment-in həmsədri Dana Uolden də əsas namizədlər arasında göstərilirdi.

    Josh D’Amaro artıq 28 ildir Disney-də çalışır. O, 2020-ci ildən etibarən “Disney Experiences” bölməsinə rəhbərlik edir və bu çərçivədə dünya üzrə 12-dən çox tema parkı və 57 kurorta nəzarət edir. Bundan əlavə, Disney-in kruiz xətti, Imagineering bölməsi, istehlak məhsulları və rəqəmsal layihələr, o cümlədən Epic Games ilə Fortnite daxilində qurulan Disney rəqəmsal dünyası da onun səlahiyyətlərinə daxildir.

    Yeni CEO kimi D’Amaro Disney-in gələcək strategiyasına rəhbərlik edəcək. Buraya müstəqil ESPN striminq xidmətinin işə salınması, eləcə də OpenAI ilə bağlanmış milyard dollarlıq razılaşma daxildir. Bu əməkdaşlıq çərçivəsində istifadəçilər Disney-in 250-dən çox obrazı ilə süni intellekt vasitəsilə video məzmun yarada biləcək və həmin kontentin bir hissəsi Disney Plus platformasında yayımlanacaq.