Avstraliyanın paytaxtı Kanberra-da güclü qasırğa zamanı on minlərlə ev işıqsız qalıb. Bu nasazlığı aradan qaldırmaq üçün elektrik şəbəkəsinə 10 dəqiqə ərzində elektriklə işləyən avtomobillərin akkumulyatorlarından enerji verilib. Beləliklə, dünyada ilk dəfə olaraq fövqəladə vəziyyət zamanı bu növ avtomobildən elektrik şəbəkəsinə enerji ötürülmüş oldu. Açıqlamaya görə, milli şəbəkəyə ümumilikdə 107 kilovat dəstək verilib. Kəsilmə zamanı işin aparıldığı ərazidə 16 ədəd “Nissan Leaf” markalı elektrik avtomobili enerjiyə taxılıb.

     Məlumatlara görə, əgər fasilə zamanı 105 min avtomobil bu şəkildə şəbəkəyə qoşularsa, Avstraliyanın böyük hissələri üçün lazım olan elektrik enerjisini təmin etmək mümkündür. Digər tərəfdən, təbii ki, şəbəkəyə 16 avtomobilin gücü bütün evlərdə işıqların yandırılması üçün kifayət etməsə də, bu hadisə, bu istiqamətdə atılan ilk addım kimi yadda qalmağı bacardı. Kanberra-da bu məqsədə xidmət edən cəmi 51 avtomobil var və bu rəqəmin artırılması planlaşdırılır. 

     Hər şeydən əvvəl, şəbəkəyə qoşulmuş avtomobillər hər dəfə elektrik şəbəkəsinə qoşulduqda şəbəkəyə nəzarət etməli və milli şəbəkə sürətlə enerji itirdikdə sistemi yenidən balanslaşdırmaq üçün işə başlamalıdır. Bununla bağlı qanunvericilik də mövcuddur. Nəqliyyat vasitəsi sahibləri öz iradələrinə zidd olaraq avtomobillərindən enerji alınmasını istəməyə bilərlər. Bu istiqamətdə müəyyən addımlar atılmalıdır. Həmçinin milli şəbəkə həddindən artıq yükləndiyi zaman hazırda şarj olan nəqliyyat vasitələrinin şarj prosesini dayandırmağı da bir həll yolu olaraq bildirilir.