Fransa rəqabət qurumu NVIDIA işi üzrə qərara yaxınlaşır

    Fransanın Rəqabət Təşkilatı NVIDIA-ya qarşı apardığı antiinhisar araşdırmasının son mərhələsinə yaxınlaşdığını açıqlayıb. Bu qərar süni intellekt çipləri bazarında dominant mövqeyə malik olan şirkət üçün Avropada ilk böyük hüquqi sınaqlardan biri ola bilər. Qurumun baş məruzəçisi Umberto Berkani jurnalistlərə bildirib ki, istintaq artıq yekunlaşmaq üzrədir. Bununla belə, qərarın nə vaxt açıqlanacağı barədə konkret tarix verilməyib. Araşdırmanın əsası 2023-cü ilin sentyabrında qoyulub. Həmin vaxt Fransa rəqabət orqanı bulud xidmətləri bazarında rəqabətlə bağlı geniş araşdırma çərçivəsində NVIDIA-nın ölkədəki ofisində yoxlama aparmışdı. Sonradan bu araşdırma birbaşa şirkətə qarşı antiinhisar işi kimi davam etdirilib.

    2024-cü ildə Fransa rəqabət qurumu generativ süni intellekt bazarı ilə bağlı hesabat dərc edərək bu sahənin NVIDIA-nın CUDA proqram platformasından ciddi şəkildə asılı olduğunu vurğulamışdı. CUDA hazırda böyük dil modellərinin öyrədilməsi üçün istifadə olunan NVIDIA qrafik prosessorları ilə tam uyğun işləyən əsas proqram təminatı hesab olunur. Tənzimləyicilər hesab edirlər ki, bu ekosistem inkişaf etdiriciləri NVIDIA texnologiyalarına bağlı vəziyyətdə saxlayır. Araşdırmanın ikinci istiqaməti isə NVIDIA-nın CoreWeave kimi süni intellekt bulud xidmətləri göstərən şirkətlərə yatırımları ilə bağlıdır. Rəqabət qurumu hesab edir ki, bu investisiyalar onsuz da yüksək konsentrasiyaya malik bazarda NVIDIA-nın üstünlüyünü daha da gücləndirə bilər.

    Müxtəlif analitiklərin qiymətləndirməsinə görə, NVIDIA hazırda süni intellekt sürətləndirici (AI accelerator) çipləri bazarının 70 %-dən çoxuna nəzarət edir və yeni nəsil məhsulların təqdim olunması ilə bu payın daha da artacağı gözlənilir. Şirkətin bazardakı üstün mövqeyi təkcə Fransada deyil, ABŞ, Avropa İttifaqı və Çində də tənzimləyici qurumların diqqət mərkəzindədir. Eyni zamanda bu vəziyyət Avropada texnoloji müstəqillik və ABŞ istehsalı olan AI avadanlıqlarından asılılıqla bağlı narahatlıqları da artırır. Əgər Fransa rəqabət qurumu araşdırmanın nəticəsində rəsmi ittiham irəli sürərsə, bu, NVIDIA-nın qanunu pozduğunu avtomatik olaraq təsdiqləmir. Şirkət ittihamlara yazılı cavab vermək və dinləmələrdə öz mövqeyini müdafiə etmək hüququna malik olacaq. Bu cür işlərin yekun qərara çatması isə adətən bir ildən çox vaxt aparır.