Məlumata görə, çirklənmiş su, elektrik stansiyasının Blok 2 reaktor binasına qoşulmuş çəndən sızaraq reaktor binasının birinci zirzəmisində toplanıb. Bölgədə onsuz da mövcud olan çirkli suyun səviyyəsinin qalxmasına səbəb olan yeni sızmanın binadan kənara çıxmadığı və buna görə də ətraf mühitə zərər vermədiyi vurğulanır. TEPCO-nun məlumatına görə, sızma ilk dəfə ötən cümə günü çəndəki suyun səviyyəsində azalma aşkar edildikdə müəyyən edilib və sonrakı yoxlama zamanı suyun reaktor binasının üçüncü mərtəbəsindəki otaqda yerləşən drenaja axdığı müəyyən edilib. Firma, otaqdakı radiasiya səviyyəsini ölçmək və sızmanın dəqiq yerini və səbəbini müəyyən etmək üçün uzaqdan idarə olunan robotdan istifadə edir. Araşdırmalar çərçivəsində hovuzun soyuducu nasosu da müvəqqəti olaraq dayandırılıb.

     Bildirilir ki, hadisə yanacağın 65 dərəcə Selsi həddini aşmasına səbəb olmayacaq. Ətraflı robot əsaslı araşdırmalar davam edir. Digər tərəfdən, bu ilin əvvəlində 5.5 tonluq radioaktiv su sızması aşkar edilib. Məlum olduğu kimi, TEPCO, 2023-cü ilin avqust ayından etibarən elektrik stansiyasından suların okeana axıdılmasına başlayıb. Bu prosesin ətraf mühitə zərər verməyəcəyi həm Yaponiya, həm də beynəlxalq nüvə tənzimləyiciləri tərəfindən təsdiqlənib. 11 mart 2011-ci ildə 9.0 bal gücündə zəlzələ və sonrakı sunami ilə vurulan Fukuşima Atom Elektrik Stansiyasında nüvə ərimələri meydana gəlmiş və radiasiya açığa çıxaraq Beynəlxalq Nüvə və Radioloji Hadisələr Şkalasında ən yüksək səviyyə olan 7-ci səviyyəli nüvə qəzasına səbəb olmuşdu. Bu prosesdə külli miqdarda çirkli su açığa çıxmışdı.

     TEPCO, ötən ildən bu çirkab suları seyrəldərək okeana buraxır. Çirkli su indiyədək 7 dəfə okeana axıdılıb. Hər atqı ilə 7800 ton su buraxılır. Ümumilikdə isə 54.6 min ton çirkli su axıdılıb. Ancaq mövcud məlumatlara görə, obyektdə 1.3 milyon ton çirkli su var. Bütün bu suyun boşaldılması təxminən 30 il çəkəcək. Fukusima Atom Elektrik Stansiyasının tam sökülməsi isə 40 ilə qədər vaxt aparacaq.