Hollivudda dələduzluq işi: Rejissor 11 milyon dolları mənimsəyib

    Technote.az “The Verge” platformasına istinadən bildirir ki, Hollivud rejissoru Carl Erik Rinsch Netflix-i 11 milyon dollar məbləğində dələduzluq yolu ilə aldatmaqda təqsirli bilinib. Deadline nəşrinin məlumatına görə, Nyu-York məhkəməsində keçirilən iclasda münsiflər heyəti Rinsch-i bir neçə maddə üzrə, o cümlədən maliyyə fırıldağı və çirkli pulların yuyulması ittihamları ilə günahkar hesab edib.

    “47 Ronin” filmi ilə tanınan rejissor 2024-cü ilin mart ayında rəsmi olaraq ittiham olunmuşdu. ABŞ prokurorlarının bildirdiyinə görə, Rinsch Netflix-dən aldığı 11 milyon dolları planlaşdırılan elmi-fantastik serialın tamamlanması üçün deyil, şəxsi məqsədləri üçün istifadə edib. Söhbət əvvəlcə “White Horse”, daha sonra isə “Conquest” adlandırılan serial layihəsindən gedir. Məhkəmənin qərarı ilə Rinsch dələduzluq və maliyyə cinayətlərinə görə məsuliyyətə cəlb olunub.