Intel-in Avropa İttifaqına qarşı apellyasiyası nəticə vermədi

    Technote.az “Engadget” platformasına istinadən bildirir ki, Intel Avropa İttifaqının 16 il əvvəl başlatdığı rəqabət pozuntusu işi üzrə son müraciətini də uduzub. Reuters-in məlumatına görə, şirkət 2009-cu ildən davam edən araşdırma çərçivəsində Avropa Komissiyasının tətbiq etdiyi cəriməni ödəməli olacaq. Buna baxmayaraq, Intel cərimənin məbləğini 376 milyon avrodan 237 milyon avroya endirməyə nail olub.

    İşin kökü 2000-ci illərin əvvəlinə, netbook-ların populyar olduğu dövrə gedib çıxır. Avropa Komissiyası həmin vaxt Intel-i iki əsas pozuntu ilə ittiham etmişdi: rəqibləri bazardan sıxışdırmaq üçün gizli və qanunsuz endirimlər təklif etməsi və PC istehsalçılarını AMD prosessorlu məhsulların istehsalını gecikdirməyə və ya tamamilə dayandırmağa təşviq etməsi. Məhz ikinci hal bu gün qüvvədə qalan cərimənin əsasını təşkil edir. Söhbət 2002–2006-cı illərdə HP, Acer və Lenovo kimi istehsalçıları AMD əsaslı kompüterləri bazara çıxarmağı gecikdirmək üçün verilən ödənişlərdən gedir.

    İllər ərzində bu iş müxtəlif məhkəmələrdə mübahisəli şəkildə davam edib. 2017-ci ildə Avropa Ədalət Məhkəməsi işin bir hissəsinin yenidən qiymətləndirilməsini tələb etdi. 2022-ci ildə isə məhkəmə Intel-ə qarşı əvvəlki 1,06 milyard avroluq böyük cəriməni ləğv etdi. Lakin qərar qüvvədə qaldı və 2023-cü ildə yenidən təsdiqləndi. Intel-in son müraciəti bu cəriməni də tam ləğv etdirmək məqsədi daşıyırdı, lakin yalnız məbləğin üçdə birini azaltmaqla nəticələndi. Buna baxmayaraq, proses hələ yekunlaşmayıb. Həm Intel, həm də Avropa Komissiyası qərarı hüquqi əsaslarla yenidən Avropa Ədalət Məhkəməsinə apara bilər.