Linux tərtibatçıları yeni internet yaş yoxlaması qanunlarına qarşı çıxır

    Technote.az “The Verge” platformasına istinadən bildirir ki, ABŞ-də qəbul edilən yeni internet yaş məhdudiyyəti qanunları açıq mənbə proqram təminatı dünyasında ciddi narahatlıq yaradıb. Xüsusilə Linux əməliyyat sistemini inkişaf etdirən proqramçılar hesab edir ki, bu qanunlar həm istifadəçi məxfiliyinə, həm də açıq mənbənin əsas fəlsəfəsinə ziddir.

    Məsələ ilk dəfə Kolorado ştatında təqdim edilən SB26-051 adlı qanun layihəsindən sonra gündəmə gəlib. Layihəyə əsasən əməliyyat sistemləri istifadəçilərin yaşını toplamalı və bu məlumatı tətbiq istehsalçılarına ötürməli idi. Məqsəd isə uşaqlar üçün uyğun olmayan tətbiqlərin və funksiyaların məhdudlaşdırılması idi. Lakin bu tələb təkcə Apple və Google kimi böyük şirkətlərə deyil, Linux kimi açıq mənbə sistemlərini hazırlayan kiçik komandalar və fərdi proqramçılara da təsir edə bilərdi.

    Linux əsaslı Pop!_OS sisteminin yaradıcısı olan Carl Richell bu qanunun açıq mənbə ekosistemi üçün təhlükəli olduğunu bildirib. Onun sözlərinə görə, Linux insanların kompüter texnologiyalarını öyrənməsi üçün ən azad və açıq platformalardan biridir. Yaş yoxlaması kimi sistemlər isə uşaqların bəzi tətbiqlərə və ya “root access” kimi əsas funksiyalara çıxışını məhdudlaşdıra bilər.

    Richell bir neçə həftə ərzində qanun layihəsi üzərində işləyərək açıq mənbə sistemləri üçün istisna yaradılmasına nail olub. Nəticədə Kolorado qanununa Linux və digər açıq mənbə əməliyyat sistemlərini qoruyan xüsusi maddə əlavə edilib. Yeni düzəlişə görə, istifadəçiyə proqramı dəyişdirmək, kopyalamaq və yenidən yaymaq azadlığı verən açıq mənbə sistemləri yaş təsdiqi qaydalarından azad ediləcək.