Microsoft-un tanınmış rəhbəri Yusuf Mehdi 35 ildən sonra şirkətdən ayrılır

    Technote.az “The Verge” platformasına istinadən bildirir ki, Microsoft-da 35 ildən çox çalışan və şirkətin istehlakçı yönümlü marketinq fəaliyyətlərinə rəhbərlik edən Yusuf Mehdi vəzifəsindən ayrılmağa hazırlaşır. Şirkətin icraçı vitse-prezidenti və istehlakçı marketinq direktoru olan Mehdi daxili məktubunda bildirib ki, Microsoft-dan ayrılmaq qərarı verib. Bununla belə, o, 2027-ci ilə qədər Windows, istehlakçılar üçün Copilot və Microsoft 365 istehlakçı biznesi üzrə marketinq fəaliyyətlərini davam etdirəcək.

    Yusuf Mehdi ayrılma qərarını komandaya keçid dövrünü düzgün təşkil etmək və gələcək strategiyanı uğurla davam etdirmək istəyi ilə əlaqələndirib. O qeyd edib ki, hazırda həm Microsoft, həm də müştərilər üçün vacib dönüş nöqtəsidir Məlumata görə, Mehdi keçid planı üzərində Microsoft CEO-su Satya Nadella və şirkətin marketinq direktoru Takeshi Numoto ilə birlikdə işləyir. Hələlik onun yerinə kimin təyin ediləcəyi açıqlanmayıb.

    Qeyd edək ki, Yusuf Mehdi Microsoft-da karyerasına 1990-cı illərdə təcrübəçi kimi başlayıb. O, ilk illərində Windows 3.1 və Windows 95 əməliyyat sistemlərinin təqdimatında iştirak edib, daha sonra Internet Explorer marketinqinə rəhbərlik edib. Mehdi həmçinin 10 ildən artıq müddətdə Microsoft-un axtarış və onlayn bizneslərinə rəhbərlik edib və Bing axtarış sisteminin yaradılmasında iştirak edən əsas şəxslərdən biri olub.