Böyük izləyici kütləsi olan MrBeast-in X-da (keçmiş Twitter) paylaşdığı ilk video sosial şəbəkələrdə gündəmə səbəb olub. Daha öncələr YouTube kimi platformalarda izlənmə rekordları qıran MrBeast bu dəfə X platformasında etdiyi ilk paylaşımla sosial medianın gündəmində ildırım kimi səs saldı.

     Belə ki, gənc YouTuber X platformasında paylaşdığı ilk video ilə 250 min dollar qazanc əldə etməyi bacarıb. O, bu barədə elə öz X səhifəsində "İlk videom 250 min dolların üzərində qazanc əldə etdi" deyərək paylaşım edib. Gündəmə bomba kimi düşən bu xəbərin ardınca MrBeast yeni paylaşım edərək videodan əldə etdiyi qazancı təsadüfi 10 izləyicisinə hədiyyə edəcəyini də bildirib, yəni hər izləyici üçün 25.000 dollar. Bununla birlikdə o, bunu əyləncə məqsədi ilə edəcəyini də həmçinin qeyd edib.

     Görünən odur ki, MrBeast-in X platformasında bu cür səs salması tək onun və izləyicilərinin işinə yaramayıb. Buna səbəb isə Elon Musk-un Qəzza müharibəsinə göstərdiyi münasibət idi. Hansı ki, Musk-un fikirləri reklamçılar tərəfindən heç də xoş qarşılanmamışdı. Buna görə də X platformasında kəskin istifadəçi azalması da müşahidə edilirdi. Lakin yanvar ayının əvvəlində Elon Musk-un paylaşdığı statiskalara əsasən artıq X platformasının istifadəçi sayı geri dönüş edərək yenidən artmağa davam edir.