MTV Rewind: 24/7 musiqi videolarının qızıl dövrü internetə qayıdır

    Technote.az “Engadget” platformasına istinadən bildirir ki, 2025-ci ilin sonunda MTV Böyük Britaniya və Avstraliya daxil olmaqla bir sıra ölkələrdə qalan son 24/7 musiqi kanallarını da bağladı. Əsas MTV kanalı illər əvvəl reallıq şoularına yönəlmişdi və musiqiyə yalnız Video Music Awards kimi tədbirlərlə qayıdırdı. Bu qərar bir çoxları üçün bütöv bir dövrün bitməsi kimi qəbul olundu.

    Məhz bu boşluğu doldurmaq üçün Flexasaurus Rex ləqəbli bir tərtibatçı MTV Rewind adlı veb tətbiq hazırlayıb. Hazırda MTV Rewind-də 11 kanal mövcuddur. Buraya MTV-nin 1981-ci ildə yayıma başladığı ilk günün videoları, MTV Unplugged çıxışları, rep janrına həsr olunmuş axın, 1970–2020-ci illəri əhatə edən onillik kanallar, eləcə də kult statuslu 120 Minutes və Headbangers Ball daxildir. Platformada indiyədək 33 mindən çox musiqi videosu toplanıb, bu isə iki aydan artıq fasiləsiz musiqi deməkdir.

    Hər kanal videoları təsadüfi ardıcıllıqla yayımlayır, istəmədiyiniz mahnını isə “skip” düyməsi ilə keçə bilərsiniz. Üstəlik, 90-cı illərin ruhuna uyğun retro reklamlar və Geocities dövrünü xatırladan “hit counter” kimi detallar da var.