Çoxlarımız hava limanına daxil olan zaman ciddi təhlükəsizlik tədbirlərinin görülməsinə alışmışıq, amma, mayelərə tətbiq olunan sərt qaydalara gəldikdə, sərnişinlər arasında anlaşılmazlıq yaranır. Əslində bu vəziyyətin çox mühüm səbəbi var...

     Təyyarələrdə mayelərin qadağan edilməsi qaydaları 2006-cı il avqustun 10-da tətbiq edilib. Bu tarix Britaniya təhlükəsizlik qüvvələrinin terror planını üzə çıxarmasından sonraya təsadüf edir. Belə ki, əvvəllər sui-qəsdçilər transatlantik uçuşlarda hidrogen peroksid əsaslı partlayıcılardan istifadə etməyi və bu partlayıcıları sərinləşdirici içki şüşələrində gizlətməyi planlaşdırırdılar. Bu təhlükəli planın qarşısı alındıqdan sonra bütün mayelərin təyyarələrdə daşınması qadağan edildi, lakin bu qayda 2006-cı ilin noyabrında dəyişdirildi və sərnişinlərə mayeləri maksimum 100 ml tutumlu konteynerlərdə təyyarəyə gətirməyə icazə verildi.

     100 ml limiti təhlükəsizlik orqanlarının partlayıcı maddələrin risklərini effektiv şəkildə idarə edə bilməsi üçün müəyyən edilmişdir. Bu limit maye partlayıcı maddələrin yaratdığı təhlükələri müəyyən etmək və qarşısını almaq üçün nəzərdə tutulmuş praktiki təhlükəsizlik balansıdır. Yəni 100 ml və ya daha az maye həcminin böyük partlayış riski yaratması ehtimalı azdır.