Netflix Red Dead Redemption oyununu rəsmi olaraq mobil cihazlara gətirib

    Technote.az "TechCrunch" platformasına istinadən bildirir ki, Netflix oyun kataloqunu genişləndirərək Red Dead Redemption-un mobil versiyasını rəsmi şəkildə istifadəyə verib. Bu addım seriya pərəstişkarları üçün xüsusi əhəmiyyət daşıyır, çünki oyun ilk dəfədir ki, iOS və Android platformalarında rəsmi şəkildə əlçatan olur.

    Artıq Netflix abunəçiləri oyunu mobil cihazlarına yükləyə və onun üçün uyğunlaşdırılmış idarəetmə elementlərindən, toxunma əsaslı nişan alma və hərəkət mexanizmlərindən istifadə edə bilərlər. Bununla belə, bəzi məhdudiyyətlər mövcuddur: oyunda çoxnövlü rejim (multiplayer) yoxdur və oynamaq üçün daimi internet bağlantısı tələb edilir. Offline rejimi dəstəklənmir.

    Red Dead Redemption-un Netflix oyun kataloquna əlavə olunması şirkətin oyun strategiyası üçün mühüm addım hesab edilir. Son illərə qədər Netflix oyunlarının istifadəsi çox aşağı, abunəçilərin 1 %-dən də az səviyyədə idi. Lakin 2024-cü ildə vəziyyət dəyişməyə başladı və Netflix Games yükləmələrinin illik artımı 180 % olaraq qeydə alındı.