Netflix video podkastları yayımlamağa başlayır

    Technote.az “Engadget” platformasına istinadən bildirir ki, Netflix video podkast bazarına daxil olmağa hazırlaşır. Şirkət iHeartMedia ilə razılaşma imzalayaraq, platformasında video formatlı podkast epizodlarını yayımlamağa başlayacağını açıqlayıb. Razılaşma çərçivəsində 15-dən çox məşhur podkastın yeni epizodları Netflix-də yer alacaq.

    Bu siyahıya The Breakfast Club, Dear Chelsea, My Favorite Murder və digər populyar layihələr daxildir. İstifadəçilər bu video podkastlara 2026-cı ilin əvvəlindən etibarən çıxış əldə edəcəklər. Razılaşma yalnız yeni epizodları deyil, eyni zamanda seçilmiş arxiv buraxılışlarını da əhatə edir. Qeyd edək ki, bu podkastların bir çoxunun video versiyaları artıq YouTube platformasında mövcuddur.

    Netflix-in bu addımı şirkətin daha əvvəl Spotify ilə bağladığı oxşar razılaşmanın davamı kimi qiymətləndirilir. Həmin əməkdaşlıq çərçivəsində The Bill Simmons Podcast və The Zach Lowe Show kimi podkastların video versiyalarının yayımlanması planlaşdırılır. Podkastlar bir çox istifadəçi üçün fon səsi kimi istifadə olunduğundan, Netflix bu seqmentdə böyük oyunçuya çevrilməyi hədəfləyir. Oxşar strategiyanı Disney+ da tətbiq etməyə başlayıb və platforma The Rich Eisen Show proqramını həftə içi yayımlamaq üçün ayrıca razılaşma imzalayıb.