Netflix Warner Bros. Discovery uğrunda mübarizədən geri çəkildi

    Technote.az “Engadget” platformasına istinadən bildirir ki, media sənayesində son aylarda diqqətlə izlənilən Netflix və Paramount Skydance arasında gedən maliyyə mübarizəsi yeni mərhələyə qədəm qoyub. Warner Bros. Discovery (WBD) şirkətinin direktorlar şurası bildirib ki, Paramount Skydance-ın son təklifi daha sərfəli hesab edilib.

    Şirkət Netflix-ə Paramount-un şərtlərini uyğunlaşdırmaq üçün dörd iş günü vaxt versə də, platforma təklifini artırmaqdan imtina edib. Netflix-in həmtəsisçiləri və həmsədrləri Ted Sarandos və Greg Peters açıqlamalarında bildiriblər ki, onlar Warner Bros.-un simvolik brendlərinin güclü idarəçiləri ola biləcəklərinə inanırdılar. Lakin bu razılaşma onlar üçün “istənilən qiymətə mütləq alınmalı aktiv” deyil, “uyğun qiymətə əldə edilə biləcək fürsət” idi.

    Paramount Skydance-ın son təklifi hər WBD səhmi üçün 31 dollar ödəməyi nəzərdə tutur. Bundan əlavə, Paramount Netflix ilə WBD arasında mövcud birləşmə razılaşmasının ləğvi üçün tələb olunan 2,8 milyard dollarlıq cəriməni də öz üzərinə götürməyi təklif edib. Beləliklə, Netflix-in Warner Bros. hissəsini təxminən 82,7 milyard dollara almaq planı reallaşmaya bilər. Əvəzində şirkət təxminən 3 milyard dollarlıq kompensasiya ilə bu prosesdən maliyyə baxımından zərərsiz çıxa bilər.

    Qeyd edək ki, Paramount Skydance daha əvvəl bütün Warner Bros. Discovery biznesini ələ keçirmək üçün “hostile takeover” cəhdi etmişdi. İlk təklif rədd edildikdən sonra tərəflər arasında bir neçə dəfə yeni təklif və qarşı-təklif mübadiləsi baş verib. Hələlik WBD Paramount-un təklifini rəsmi şəkildə qəbul etməyib. Razılaşma baş tutsa belə, uzunmüddətli tənzimləyici təsdiqlər tələb olunacaq və bu proses yeni müzakirələrə səbəb ola bilər.