Nyu-York iri data mərkəzlərinin tikintisini müvəqqəti dayandırdı

    ABŞ-nin Nyu-York ştatı yeni iri data mərkəzlərinin tikintisini müvəqqəti dayandıran ilk ştat olub. Ştatın qubernatoru Kathy Hochul imzaladığı sərəncamla gücü 50 meqavatdan (MW) yuxarı olan yeni data mərkəzləri üçün ekoloji icazələrin verilməsini dayandırıb. Qərarın məqsədi sürətlə artan data mərkəzlərinin elektrik enerjisi istehlakı, su resurslarına təsiri və ətraf mühitə mümkün zərərləri ilə bağlı yeni qaydaların hazırlanmasına vaxt qazanmaqdır. Moratorium maksimum 1 il qüvvədə qala bilər.

    Qubernatorun sözlərinə görə, süni intellekt texnologiyalarının sürətli inkişafı nəticəsində data mərkəzlərinə tələbat kəskin artıb. Bu isə elektrik tariflərinin yüksəlməsi, təbii resursların daha çox istifadə olunması və yerli icmalar üçün əlavə yük yaradılması ilə bağlı narahatlıqları artırır. Sərəncam yalnız 50 MW-dan böyük layihələri əhatə edir. Bu hədd xəstəxanalar və digər müəssisələr üçün tikilən kiçik data mərkəzlərinin fəaliyyətinə mane olmamaq məqsədilə seçilib.