Özbəkistanın Uzum startapının dəyəri 7 ayda 2,3 milyard dollara yüksəldi

     Technote.az “TechCrunch” platformasına istinadən bildirir ki, Özbəkistanın fintech startapı Uzum cəmi yeddi ay ərzində şirkət dəyərini əhəmiyyətli dərəcədə artıraraq 2,3 milyard dollara yüksəldib. Bu artım investorların ölkənin sürətlə inkişaf edən rəqəmsal iqtisadiyyatına artan marağını göstərir.

    Yeni qiymətləndirmə Oman dövlət investisiya fondlarının rəhbərlik etdiyi 131,5 milyon dollarlıq investisiya raundundan sonra formalaşıb. Raundda mövcud investorlar olan Tencent, VR Capital və FinSight Ventures də iştirak edib. İnvestisiyanın 81,5 milyon dolları səhmlər, 50 milyon dolları isə növbəti maliyyələşdirmə mərhələsinə bağlı konvertasiya olunan maliyyə aləti kimi təqdim olunub.

     Şirkət 2026-cı ilin ikinci yarısında və ya 2027-ci ilin əvvəlində IPO öncəsi mərhələdə əlavə olaraq 250–300 milyon dollar investisiya cəlb etməyi planlaşdırır. Xatırladaq ki, Uzum 2025-ci ilin avqustunda 1,5 milyard dollar dəyər qiymətləndirilməsi ilə 65,5 milyon dollar investisiya almış və 2024-cü ilin martında Özbəkistanın ilk “unikorn” startapına çevrilmişdi.

     Mərkəzi Asiyanın ən sıx əhalili ölkəsi olan Özbəkistanda rəqəmsal iqtisadiyyatın sürətli böyüməsi, gənc əhali, smartfon istifadəsinin artması və onlayn ticarət ilə bank xidmətlərinin hələ aşağı yayılması investor marağını gücləndirən əsas faktorlar hesab olunur.

     2022-ci ildə qurulan Uzum özünü e-ticarət, ödəniş və maliyyə xidmətlərini birləşdirən “rəqəmsal ekosistem” kimi təqdim edir. Şirkət əvvəlcə Uzum Market adlı marketplace platforması ilə fəaliyyətə başlayıb, daha sonra Uzum Bank rəqəmsal bank xidməti, Uzum Nasiya istehlak kredit platforması və sürətli yemək çatdırılması xidməti Uzum Tezkor ilə fəaliyyət sahəsini genişləndirib.

     Şirkətin məlumatına görə, platformanın aylıq aktiv istifadəçi sayı artıq 20 milyona çatıb ki, bu da ölkənin yetkin əhalisinin yarıdan çoxunu əhatə edir. Marketplace üzərindən 17 mindən çox yerli satıcı fəaliyyət göstərir və ekosistem daxilində 2025-ci ildə ümumilikdə təxminən 11 milyard dollarlıq ödəniş əməliyyatı həyata keçirilib. İllik aktiv alış-veriş edən istifadəçilərin sayı isə bir il ərzində 3 milyondan 4,6 milyona yüksəlib.