Roblox qlobal miqyasda yaş yoxlamasını məcburi etdi

    Technote.az “TechCrunch” platformasına istinadən bildirir ki, uşaq təhlükəsizliyi ilə bağlı artan məhkəmə iddiaları və araşdırmalardan sonra Roblox platforması bütün dünyada yeni bir qaydanı tətbiq etməyə başlayıb. Belə ki, artıq çat funksiyasından istifadə etmək istəyən bütün istifadəçilər yaşlarını təsdiqləməlidirlər.

    Yeni sistemə əsasən, istifadəçilər Roblox tətbiqini açaraq kameraya icazə verməli və ekranda göstərilən təlimatlara uyğun şəkildə üz tanıma prosesini tamamlamalıdırlar. Şirkət bildirir ki, yoxlama başa çatdıqdan sonra istifadəçilərin şəkil və video görüntüləri dərhal silinir.

    Yaş yoxlaması üçün proses üçüncü tərəf texnologiya şirkəti olan Persona tərəfindən həyata keçirilir. Roblox-un açıqlamasına görə, Persona da yoxlama bitdikdən sonra bütün vizual məlumatları saxlamadan silir. 13 yaş və üzəri istifadəçilər üçün alternativ seçim də mövcuddur. Onlar üz tanıma əvəzinə şəxsiyyət vəsiqəsi (ID) vasitəsilə yaşlarını təsdiqləyə bilərlər. Qeyd edək ki, yaş yoxlaması ümumilikdə könüllüdür, lakin çat və ünsiyyət funksiyalarından istifadə etmək üçün məcburidir.

    Əgər sistem istifadəçinin yaşını səhv müəyyən edərsə, qərardan şikayət etmək mümkündür. Bu halda istifadəçi ID təsdiqi və ya valideyn nəzarəti vasitəsilə yaşını yenidən doğrulaya bilər. Roblox bildirir ki, platforma istifadəçi davranışlarını da analiz edir. Əgər bir hesabın real yaşı ilə davranışları arasında ciddi uyğunsuzluq aşkar edilərsə, həmin istifadəçidən yaş yoxlamasını yenidən keçməsi tələb oluna bilər.