Saxta GTA VI fayl ölçüsü internetdə panika yaradıb

    Technote.az “Mashable” platformasına istinadən bildirir ki, hələ rəsmi olaraq satışa çıxmamış Grand Theft Auto VI (GTA VI) bu dəfə də internetdə böyük müzakirələrə səbəb olub. Milad ərəfəsində sosial şəbəkələrdə yayılan saxta bir ekran görüntüsü oyunun guya 676,7 GB yaddaş tələb edəcəyi iddiasını ortaya atıb.

    Sözügedən görüntü Xbox Store səhifəsinə aid kimi təqdim edilsə də, iddianın əsassız olduğu qısa müddətdə aydınlaşıb. Birincisi, oyunun rəsmi mağaza səhifəsində hələlik heç bir fayl ölçüsü göstərilmir. Bu da normaldır, çünki GTA VI-nın çıxışına hələ təxminən bir il vaxt var və Rockstar Games belə yekun fayl ölçüsünü müəyyən etməyib. Digər tərəfdən, indiyə qədər ən böyük həcmə malik oyunlar, məsələn, Call of Duty seriyasının bəzi buraxılışları maksimum 200 GB civarında olub. 600 GB-dan çox fayl ölçüsü isə faktiki olaraq bir PlayStation 5 və ya Xbox-un əsas daxili yaddaşının demək olar ki, tamamını tutur.

    Nəticə etibarilə, GTA VI böyük və detallı bir oyun olacaq, lakin 676 GB kimi absurd bir ölçü iddiası reallıqdan uzaqdır və internetdə yayılan növbəti saxta məlumatdan başqa bir şey deyil.