Shein ABŞ-nin məşhur Everlane brendini alır

    Technote.az “TNW” platformasına istinadən bildirir ki, Shein ABŞ-nin məşhur geyim brendi Everlane-i satın alır. Məlumatlara görə, sövdələşmənin dəyəri təxminən 100 milyon dollar təşkil edir. Bu isə vaxtilə elektron ticarət dövrünün ən perspektivli DTC (Direct-to-Consumer) brendlərindən biri hesab edilən Everlane üçün əvvəlki qiymətləndirmələrdən xeyli aşağı rəqəmdir.

    Məlumata əsasən, Everlane-in direktorlar şurası sövdələşməni şənbə günü təsdiqləyib. Maraqlı məqam isə odur ki, şirkətin adi səhmdarları (common stockholders) bu satışdan hər hansı maliyyə ödənişi almayacaqlar. Əslində bu razılaşma Everlane-in əsas səhmdarı olan investisiya şirkəti L Catterton üçün borc yükündən çıxış yolu kimi qiymətləndirilir. Şirkətin payı ilə birlikdə təxminən 90 milyon dollarlıq öhdəliklər mövcud idi və son aylarda yeni investor axtarışı aparılırdı. Nəticədə alıcı kimi Shein ortaya çıxıb.

    2011-ci ildə Michael Preysman və Jesse Farmer tərəfindən yaradılan Everlane bazarda “radikal şəffaflıq” konsepsiyası ilə tanınmışdı. Şirkət geyimlərin material, əmək, logistika və gömrük xərclərini açıq şəkildə paylaşır, bunları satış qiyməti ilə müqayisə edirdi. Bu yanaşma brendə böyük populyarlıq qazandırmış və şirkətin dəyəri vaxtilə 250 milyon dolları keçmişdi.

    Son illərdə DTC bazarında vəziyyət dəyişdi. Müştəri əldə etmə xərcləri artdı, böyümə tempi zəiflədi və şirkətin maliyyə yükü ağırlaşdı. Nəticədə Everlane gözlənilən gəlir hədəflərinə çata bilmədi. Digər tərəfdə isə Shein son illərdə ultra sürətli istehsal, alqoritmik məhsul seçimi və aşağı qiymət strategiyası ilə qlobal moda bazarında dominant oyunçuya çevrilib. Şirkət eyni zamanda Avropada müxtəlif tənzimləmə təzyiqləri, müəllif hüquqları iddiaları və IPO hazırlıqları ilə gündəmdədir.