Snap 2026-cı ilin ikinci rübü üzrə maliyyə nəticələrini açıqlayıb

    Snap 2026-cı ilin ikinci rübü üzrə maliyyə nəticələrini açıqlayıb. Şirkət analitiklərin gözləntilərini üstələdiyi üçün səhmləri birja sonrası ticarətdə 13 %-ə qədər bahalaşıb. Buna baxmayaraq, Snap səhmləri ilin əvvəlindən bəri hələ də təxminən 37 % ucuzlaşıb. Şirkətin gəlirləri illik müqayisədə 19 % artaraq 1,6 milyard dollara çatıb. Xalis zərər 164 milyon dollara qədər azalıb, sərbəst pul axını isə 121 milyon dollar olub. Snap həmçinin cari rüb üçün bazar gözləntilərindən daha yüksək proqnoz açıqlayıb. Lakin maliyyə göstəricilərinin arxasında diqqətçəkən bir problem var. Snap-ın əsas gəlir mənbəyi olan reklam gəlirləri cəmi 9 % artıb. Əvəzində "digər gəlirlər" kateqoriyası 85 % yüksələrək 316 milyon dollara çatıb. Bu artım əsasən Snapchat+ abunəliyi, bulud yaddaşı və ödənişli AR linzaları hesabına baş verib. Yəni şirkət yeni istifadəçilər qazanmaqdan çox, mövcud istifadəçilərdən daha çox gəlir əldə etməyə başlayıb.

    Ən ciddi problem isə istifadəçi bazasında müşahidə olunur. Snapchat-ın gündəlik aktiv istifadəçi sayı 493 milyona yüksəlsə də, bu artım demək olar ki, tamamilə ABŞ və Avropadan kənar bazarlar hesabına təmin edilib. Şimali Amerikada gündəlik istifadəçilərin sayı 7 % azalaraq 92 milyona düşüb, Avropada isə 2 % geriləyib. Bu azalma Snap üçün xüsusilə vacibdir. Çünki şirkət üçün Şimali Amerikadakı bir istifadəçi rübdə orta hesabla 10 dollar gəlir gətirdiyi halda, digər regionlarda bu göstərici cəmi 1 dollar təşkil edir. Buna baxmayaraq, Şimali Amerikada reklam qiymətlərinin artması sayəsində bölgədən əldə olunan gəlirlər 15 % yüksəlib.