SpaceX səhmləri hələlik S&P 500 ETF-lərinə daxil olmayacaq

    S&P 500 SpaceX üçün qaydalarını dəyişməyəcəyini açıqlayıb. Bu qərar SpaceX-in birjaya çıxışından sonra indeksə sürətlə daxil olmasının qarşısını alacaq. Son aylarda SpaceX-in yaxın zamanda rekord qiymətləndirmə ilə IPO keçirməyə hazırlaşdığı barədə məlumatlar yayılıb. Bu fonda Nasdaq 100 və FTSE Russell kimi bəzi indekslər qaydalarını yumşaldaraq şirkətin daha qısa müddətdə indekslərə daxil olmasına imkan yaradıblar. Bu isə investisiya fondlarının və ETF-lərin avtomatik olaraq SpaceX səhmlərini almaq məcburiyyətində qala biləcəyi ilə bağlı müzakirələrə səbəb olmuşdu.

    Lakin S&P Dow Jones Indices açıqlayıb ki, “MegaCap” kateqoriyasına aid böyük şirkətlər üçün xüsusi istisna tətbiq edilməyəcək. Beləliklə, SpaceX ən azı 12 ay ərzində S&P 500 indeksinə daxil olmaq üçün namizəd belə ola bilməyəcək. Bununla yanaşı, S&P 500-ə qəbul olunmaq üçün şirkətin son dörd rüb ərzində ümumi mənfəət göstərməsi tələb olunur. Maraqlıdır ki, SpaceX özünün ABŞ Qiymətli Kağızlar və Birja Komissiyasına (SEC) təqdim etdiyi sənədlərdə indiyədək davamlı mənfəət əldə etmədiyini bildirib. Bu da şirkətin yaxın perspektivdə indeksə daxil olmasını daha da çətinləşdirə bilər.

    Qərar bazar iştirakçıları arasında müəyyən təəccüb doğurub. Bloomberg Intelligence analitiki James Seyffart bildirib ki, S&P 500 bazarın lideridir və digər indekslərin yolunu təkrarlamaq məcburiyyətində deyil. Bu arada bəzi analitiklər SpaceX-in ehtimal olunan 1,78 trilyon dollarlıq bazar dəyərinin həddindən artıq yüksək olduğunu düşünürlər. Morningstar araşdırma şirkəti SpaceX-i “əhəmiyyətli dərəcədə qiymətləndirilmiş” adlandıraraq onun real dəyərinin təxminən 780 milyard dollar ola biləcəyini qeyd edib. Şirkət həmçinin IPO-nun fərdi investorlar üçün ən uyğun giriş nöqtəsi olmadığını vurğulayıb.