SpaceXAI qaz turbinlərini sökəcəyini açıqladı

    SpaceXAI şirkəti Tennessi ştatının Memfis şəhəri yaxınlığında fəaliyyət göstərən süni intellekt məlumat mərkəzində istifadə olunan icazəsiz qaz turbinlərini tamamilə 2027-ci ilin iyul ayına qədər sökəcəyini açıqlayıb. Şirkətin yaydığı məlumata görə, hazırda məlumat mərkəzini enerji ilə təmin edən 69 müvəqqəti qaz turbininin əvəzinə Missisipi ştatında tikilən və 1,2 giqavat gücündə yeni elektrik stansiyası istifadəyə veriləcək. Bu stansiya ABŞ-nin Təmiz Hava Aktı (Clean Air Act) çərçivəsində verilmiş rəsmi icazə əsasında fəaliyyət göstərəcək.

    Qaz turbinlərinin sökülməsinə 2026-cı ilin avqustunda başlanacaq və prosesin 2027-ci ilin iyulunda başa çatdırılması planlaşdırılır. Məsələ ətraf mühit təşkilatlarının diqqət mərkəzindədir. NAACP təşkilatı aprel ayında SpaceXAI-a qarşı iddia qaldıraraq şirkətin icazəsiz qaz turbinlərindən istifadə etməklə Təmiz Hava Aktını pozduğunu və yaxınlıqdakı yaşayış məntəqələrində yaşayan insanların sağlamlığını təhlükə altına qoyduğunu bildirib. SpaceXAI açıqlamasında hazırkı ölçmələrin bölgədəki hava keyfiyyətinin ABŞ Ətraf Mühitin Mühafizəsi Agentliyinin (EPA) standartlarına uyğun olduğunu göstərdiyini bildirib. ABŞ Ədliyyə Nazirliyi iyun ayında məhkəmədən iddianın rədd edilməsini istəsə də, iş üzrə məhkəmə prosesi hələ də davam edir.