Tim Cook Nike-də payını ikiqat artırıb

    Technote.az “Apple Insider” platformasına istinadən bildirir ki, Tim Cook idman geyimləri nəhəngi Nike-dəki payını əhəmiyyətli dərəcədə artıraraq Wall Street-in diqqətini üzərinə çəkib. Apple-ın baş icraçı direktoru Nike səhmlərinə təxminən 3 milyon dollar əlavə investisiya edərək şirkətin yenidən yüksəliş strategiyasına açıq dəstək göstərib.

    Şirkətin açıqladığı Form 4 sənədinə əsasən, Tim Cook bazar ertəsi günü Nike-in 50 min səhmini hər biri orta hesabla 58,97 dollardan alıb. Bu alışın ümumi dəyəri 2,95 milyon dollar təşkil edir. Bununla da Cook-un Nike-dəki ümumi payı 105 min səhmə yüksəlib və hazırkı bazar qiymətləri ilə bu məbləğ 6 milyon dollardan çoxdur. Məlumatın yayımlandığı vaxtda Nike səhmləri 60 dollar həddini keçib. Analitiklər bunu Tim Cook-un sərmayəsinin bazar üçün müsbət siqnal kimi qəbul edilməsi ilə əlaqələndirirlər. Qeyd edək ki, Nike 2025-ci il ərzində dəyərinin təxminən 24 faizini itirib və bu alış ilin sonuna doğru nadir müsbət impuls kimi qiymətləndirilir.

    Tim Cook-un Nike ilə əlaqələri yeni deyil. O, 2005-ci ildən etibarən şirkətin direktorlar şurasında yer alır və Nike-in rəhbərliyinə, o cümlədən sədr Mark Parker və qurucu Phil Knight-a məsləhətlər verir. Cook eyni zamanda pərakəndə mağaza dizaynları, əsas məhsullara fokuslanma strategiyası və Çində rəqəmsal transformasiya ilə bağlı qərarlarda da aktiv rol oynayıb.