Ubisoft “Assassin’s Creed: Black Flag” remeykini rəsmi olaraq təsdiqlədi

    Technote.az “Engadget” platformasına istinadən bildirir ki, Ubisoft məşhur oyun seriyasının sevilən hissələrindən biri olan Assassin’s Creed IV: Black Flag üçün remeyk hazırladığını rəsmi şəkildə təsdiqləyib. Uzun müddətdir şayiə kimi dolaşan bu layihənin yeni adı “Assassin’s Creed: Black Flag Resynced” olacaq.

    Şirkət hələlik oyun haqqında çox detal açıqlamayıb. Paylaşılan konsept rəsmlərində isə oyunun əsas qəhrəmanı Edward Kenway gəmidə görünür. Məlumatlara görə, bu versiya sadəcə qrafik yenilənməsi deyil, daha böyük dəyişikliklərə malik tam remeyk olacaq. Vizual keyfiyyət və oyun mexanikası baxımından onun keçən il çıxan Assassin’s Creed Shadows səviyyəsinə çatdırılması planlaşdırılır. Eyni zamanda bəzi iddialara görə, yeni versiyada seriyanın klassik “müasir zaman” bölmələri çıxarılacaq və oyun tam şəkildə pirat mövzulu macəralara fokuslanacaq.

    Oyunun çıxış tarixi hələ açıqlanmayıb. Lakin Ubisoft daha əvvəl bildirmişdi ki, hələ elan olunmamış bir oyun şirkətin cari maliyyə ilinin sonuna qədər, yəni 31 mart 2027-yə qədər buraxıla bilər. Buna görə də yeni remeykin gözləniləndən daha tez təqdim olunması ehtimal edilir.