Valve-ın Portal ön oyunu F-Stop sızan fayllardan bərpa edilib

    “Valve” şirkətinin təxminən 20 il əvvəl ləğv etdiyi “Portal” ön oyunu “F-Stop” sızdırılmış materiallardan yenidən yığılıb. Artıq oyunu demək olar ki, başdan sona oynamaq olur. Kamera üzərində qurulan layihə beləliklə uzun illər sonra yenidən üzə çıxıb.

    Versiyanın əsas materialları avqustda yayılan 12 terabaytlıq böyük sızmadan götürülüb. Ancaq həmin arxivdə oyunun mənbə kodu və xəritə məlumatları yox idi. Çatışmayan son fayllar bu həftə “Valve Cut Content” adlı “Discord” icmasında üzə çıxıb. Fayllar birləşdirildikdən sonra oyunun demək olar ki, tam versiyası hazırlanıb.

    “F-Stop” əsas “Portal” oyunlarından xeyli fərqlənir. Burada oyun mexanikasının mərkəzində kamera dayanır. Oyunçu əşyanın şəklini çəkib yadda saxlayır, sonra onu “Polaroid” tipli foto ilə başqa yerə yerləşdirir. Bu sistem “Viewfinder” oyunundakı mexanikanı xatırladır. Layihədəki bəzi dialoq və elementlər sonradan “Portal 2”yə əlavə olunub.

    “F-Stop” uzun oyun deyil. Tam kampaniyanı göstərən videoların hər biri 1 saatdan azdır. Layihə “Valve” şirkətinin 2007-ci ildə keçirdiyi “Directed Design Experiments” proqramında hazırlanıb. Şirkət 3 aylıq sınaq dövründə əməkdaşlarını 5 komandaya bölərək yeni oyun ideyalarını yoxlayıb. “F-Stop”un qısa olması da onun təcrübə məqsədilə hazırlanması ilə bağlıdır.