Azərbaycanın online yemək sifarişi startapı “acqalma.az” bazara sürətli giriş edir

Startap bazarının xüsusiləşmiş bir sahəsinə çevrilən yeməklərin onlayn sifarişi artıq Azərbaycanda da mümkündür. Türkiyədən bizə yaxşı tanış olan "yemeksepeti.com” bu sahədə kifayət qədər irəliləyiş əldə etmiş və son anda şirkət 589 milyon dollara satılmışdır. Olduqca gəlirli bir sahə olan yeməklərin sifarişi və çatdırılması xidməti lokal bazarlarda fərqli startaplar tərəfindən təqdim olunur. "acqalma.az” brendi adı altında təqdim olunan yerli startapımızın platformasında "Pizza Mizza, Araz Kafesi, Bella Pizza, Dadim.az, Dönər House, Efendi Lahmacun, Fit&Fresh, Gün Aydin, Juma Restourant&Sushi Bar, Mado Japanese Restaurant, NamlıKebap, New York Pizza Baku, Pizza Bruno, Qutabçı, Soloha və Yoshi Sushi” retoranları öz menyularını təqdim edir.

Sayt hələ ki, Bakıda olan restoranları əhatə edir və bu şəbəkəyə qoşulan hər restoran öz maraqlarına uyğun olaraq çatdırılma qiymətləri və minumum sifariş həcmlərini təyin edirlər.

 

Qeyd: Əksər məşhur restoranlar isə minumum sifariş həcmi qoymaqla çatdırılmanı pulsuz edir.

 

Saytın digər maraqlı xüsusiyyətlərindən biri isə həftənin təklifləri bölməsidir. Bu bölmədə restoranlar sərfəli qiymətə menyular təklif edərək sifarişçilərin maraqlarını cəlb edirlər.

Qeyd edək ki, sifarişlərin bank və kredit kartları ilə onlayn ödənilməsi mümkündür.

Sayta daxil olduqdan sonra qarşınıza çıxan sifariş bölməsindən yerləşdiyiniz ərazini seçib, restoranların siyahınsa keçid edirsiniz. Buradan bəyəndiyiniz restoranın menyusuna baxmaq və qiymətlərlə tanış olmaq imkanınız var. Menyudan bəyəndiyiniz yeməkləri seçib səbətə əlavə edirsiniz, sifarişi tamamla bölməsindən isə sifariş haqqında məlumatları daxil edib ödəniş üsullarından birini seçməklə sifarişinizi tamamlayırsınız. 

Azərbaycan bazarının Türkiyə və digər ölkələrlə müqayisədə dar olduğu məlumdur. Hər halda "acqalma.az”-dan "yemeksepeti.com” qədər uğur gözləmək əsassız olardı. Lakin daxil olduğu bazarı nəzərə alsaq, ölkəmizdə xüsusilə Bakıda yemək sifariş edənlərin sayı kifayət qədər çoxdur. Əgər startap özünə lazım olan hədəf kütləyə çata bilsə bazarda yaxşı mövqedə qərarlaşar. Bütün restoranların menyularının bir saytda olması və əlavə olaraq bir platformada sifarişi tamamlamağın mümkünlüyü saytı dəyərli edən əsas vasitədir.

Sifariş və ətraflı məlumat üçün: www.acqalma.az