Intel prosessorlu köhnə Apple kompüterləri macOS Sonoma-nın bəzi imkanları dəstəkləməyəcək

    Apple şirkətinin bütün yeni kompüterləri Apple M seriyasına daxil olan prosessorlar ilə təchiz olunurlar və şirkət hər dəfə bu prosessorların üstünlüklərini diqqətə yetirir. Bu istiqamətdə şirkət hətta qeyri-standart üsullardan da istifadə edir. Belə ki, verilmiş məlumata əsasən Apple şirkətinin Intel prosessorları əsasında çalışan köhnə kompüterləri yeni macOS Sonoma əməliyyat sisteminin müəyyən imkanlarından məhrum olacaqlar.

    Məlumata əsasən bunun əsas səbəbi köhnə Apple kompüterlərinin köməkçi süni zəka prosessoruna sahib olmamalarıdır. Məsələn bu cür prosessor macOS Sonoma-da olan Presenter Overlay adlı funksiyanın çalışması üçün lazımdır. Qeyd etmək lazımdır ki, sözügedən funksiya video konfranslar çərçivəsində istifadə ediləcək və istifadəçiyə video konfrans zamanı arxa fonda müəyyən kontentləri əks etdirməyə imkan verəcək.

    Bununla yanaşı köhnə Apple kompüterlərində Siri səsli köməkçisini “Siri” səsli əmri ilə işə salmaq mümkün olmayacaq. Həmin kompüterlərin istifadəçiləri Siri-ni işə salmaq istəyən zaman “Hey Siri” səsli əmrindən istifadə etməli olacaqlar. MacOS Sonoma-da təqdim edilmiş Game Mode adlı oyun rejimini də yalnız Apple M seriyalı prosessorlara sahib kompüterlərdə işə salmaq mümkün olacaq. Qeyd etmək lazımdır ki, macOS Sonoma-nın stabil versiyası bu ilin payız fəslində istifadəyə verilməlidir.