Statcounter analitik şirkəti müxtəlif Windows versiyalarının istifadəçilər arasında məşhurluqları üzrə yenilənmiş statistikanı təqdim edib. Beləliklə yeni məlumatlara əsasən Microsoft-un hal hazırda aktual olan yeni əməliyyat sistemi Windows 11 bazardakı payını ləng şəkildə genişləndirməyə davam edir. Statistikaya əsasən keçən ayın sonunda sözügedən əməliyyat sisteminin bazardakı payı 2.03% yüksələrək 23.01% təşkil edib.

    Analitiklərin hesablamalarına əsasən əgər Windows 11 indiki inkişaf tempini qoruyub saxlasa, 2 ildən sonra o, Windows 10-un bazarda sahib olduğu pay göstəricisinə (71.45%) çatacaq. Qeyd etmək lazımdır ki, Windows 10-un bazardakı payı aprel ayı üzrə 2.03% aşağı düşüb. Maraqlısı ondadır ki, keçən ay üzrə Windows 7 ilə Windows 8.1-in bazardakı payları bir qədər yüksəlib. Belə ki, Windows 7-nin bazardakı poyı 3.78%-ə, Windows 8.1-in payı isə 0.85%-ə yüksəlib. Windows 8 (0.44%) ilə Windows XP-yə (0.35%) gəldikdə isə onlar artıq tədricən statistikadan kənarda qalmağa başlayıblar.