App Store-da OpenAI Sora tətbiqinin saxta versiyaları yayılıb

     OpenAI tərəfindən hazırlanmış və mətn təsvirinə əsasən videolar yaratmağa imkan verən Sora tətbiqinin sürətli şəkildə məşhurluq qazanması bir çox dələduzları bundan qazanc əldə etməyə cəhd göstərməyə vadar edib. Halbuki bu süni intellekt əsaslı video generatoru hələlik yalnız iOS cihazlarında mövcuddur və onu yükləmək üçün dəvət almaq tələb olunur. Buna baxmayaraq, App Store-da artıq adında Sora və ya Sora 2 ifadəsi olan çoxlu sayda saxta tətbiqlər peyda olub (ikinci variant OpenAI-nin yeni video generasiya modeli ilə əlaqələndirilir). Maraqlıdır ki, bu saxta tətbiqlər hər hansısa şəkildə Apple platformasında dərc olunmazdan əvvəl yoxlama prosesindən keçməyi bacarırlar - halbuki onların adında OpenAI-yə məxsus qeydiyyatdan keçmiş ticarət nişanı olan “Sora” sözü istifadə olunur.

     Bundan əlavə, Sora alqoritmi mobil tətbiq istifadəyə verilməzdən əvvəl də texnoloji dairələrdə yaxşı tanınırdı. Appfigures analitika platformasının məlumatına görə, App Store-da Sora tətbiqi yayımlandıqdan sonra onunla oxşar ada malik saxta tətbiqlər peyda olub. Onların yarıdan çoxunun adında “Sora 2” ifadəsi istifadə edilib. Bu tətbiqlərin bəziləri əvvəllər App Store-da başqa adlarla da görünmüşdü. Mütəxəssislərin hesablamalarına əsasən, saxta Sora tətbiqləri ümumilikdə App Store-dan təxminən 300 000 dəfə yüklənib, bunun 80 000-i isə rəsmi Sora tətbiqinin istifadəyə verilməsindən sonrakı dövrə təsadüf edir.

     Müqayisə üçün, rəsmi Sora tətbiqi cəmi bir neçə gün ərzində 1 milyondan dəfədən çox yüklənib. Demək olar ki, bütün bu imitasiya tətbiqlər Sora-nın işə salınmasından dərhal sonra yenilənib. Görünür, onların sahibləri istifadəçilərin axtarış sorğularından faydalanmaq məqsədilə tətbiqlərin adlarını dəyişiblər. Lakin bu tətbiqlərin Apple moderatorlarının yoxlamasından necə keçdiyi məlum deyil. Nəticədə onların çoxu sonradan App Store-dan silinib. Ən çox yüklənmiş tətbiq isə “Sora 2 - AI Video Generator” olub, yüklənmə sayı 50 000-in üzərindədir. Qiymətləndirmələrə görə, bu saxta tətbiqlər cəmi qısa müddət ərzində 160 000$-dan çox gəlir əldə ediblər.