Apple e-poçt domenlərini birləşdirir

    Apple istifadəçilərin məxfilik imkanlarını təmin edən “Sign in with Apple” və “Hide My Email” xidmətlərində istifadə olunan e-poçt domenlərini birləşdirməyə hazırlaşır. Şirkət bununla bağlı tərtibatçılara və e-poçt xidməti provayderlərinə sistemlərini yeniləmələri üçün xəbərdarlıq edib. Apple-ın 15 iyun tarixli bildirişinə əsasən, tətbiq və veb xidmət sahibləri hesab sistemlərini, e-poçt doğrulama alətlərini və icazə siyahılarını yeni domenə uyğunlaşdırmalıdırlar. Eyni zamanda e-poçt provayderlərinə filtrasiya, yönləndirmə və bloklama qaydalarını nəzərdən keçirmək tövsiyə olunub.

    Hazırda “Sign in with Apple” xidməti istifadəçilər üçün “privaterelay.appleid.com” sonluqlu xüsusi "relay" ünvanları yaradır. “Hide My Email” funksiyası isə “icloud.com” domenindən istifadə edir. Dəyişiklikdən sonra hər iki xidmət üçün yaradılan yeni ünvanlar “private.icloud.com” domeni üzərindən işləyəcək. Apple bildirib ki, mövcud "relay" ünvanları fəaliyyətini davam etdirəcək və gələn məktublar əvvəlki kimi istifadəçilərə yönləndiriləcək. Bununla belə, köhnə domenlərə əsaslanan yoxlama və emal qaydaları yenilənməzsə, bəzi xidmətlərdə problemlər yarana bilər.

    Şirkətin xəbərdarlığına görə, hazırlıq görülmədiyi halda istifadəçilər yeni hesab yaratmaqda, parol sıfırlama məktublarını almaqda, təsdiqləmə kodlarını qəbul etməkdə və digər hesab bildirişlərini əldə etməkdə çətinliklərlə üzləşə bilərlər. Apple hələlik dəyişikliyin dəqiq tətbiq tarixini açıqlamayıb. Bununla belə, şirkət bütün tərəfləri keçid prosesinə indidən hazırlaşmağa çağırır.