Kibertəhlükəsizlik mütəxəssisləri kibercinayətkarların "Apple Store" mağazasını hədəfə aldıqlarını aşkar ediblər. Cənubi Koreya və Yaponiyada aparılan araşdırmalar nəticəsində məlum olub ki, Apple-ın onlayn satış mağazasında “başqası təhvil alacaq” seçimi fırıldaqçıların əlinə keçib. Apple-ın onlayn mağazasındakı "başqası təhvil alacaq" seçimi sizə sifariş verməyə və başqasının onu fiziki olaraq götürməsinə imkan verir. Bu xüsusiyyət fişinq hücumları həyata keçirən kibercinayətkarların işini bir xeyli asanlaşdırıb. Belə ki, kibertəhlükəsizlik mütəxəssisləri tərəfindən aparılan araşdırmaya görə, kibercinayətkarlar ələ keçirdikləri kredit kartı məlumatlarından istifadə edərək Apple-ın rəsmi satış saytında kredit kartı sahibləri adından bir çox məhsul sifariş edib və daha sonra “başqası təhvil alacaq” seçimindən istifadə edərək onları mağazalardan özləri götürüblər. Mütəxəssislər Cənubi Koreya və Yaponiyada fişinq hücumları sayəsində 400 min dollardan çox pulun oğurlandığını bildiriblər.

     Bütün bunlar baş verərkən Apple-ın buna qarşı nə etdiyini soruşa bilərsiniz. Belə ki, kibertəhlükəsizlik mütəxəssislərinin araşdırmasına görə, Apple müvafiq ölkələrin hüquq-mühafizə orqanları ilə əməkdaşlıq etməyib. Bu səbəbdən Apple tərəfindən cihazları sıradan çıxarmaq kimi addımlar atıla bilməzdi. Bununla belə, Apple-ın haqlı olduğu bir vəziyyət də var. Araşdırmalarda daha çox Çinli kibercinayətkarların bu üsula üstünlük verdiyi müəyyən edilib. Yəni Cənubi Koreya, Yaponiya kimi ölkələrdə başladılan araşdırmaların Çində həll olunma ehtimalı kifayət qədər aşağı idi.