Avtomobil kameraları ilə bağlı təhlükəli problem üzə çıxıb

    Avtomobil kameraları istehsalçısı olan BlackVue istifadəçilərinin canlı görüntülərini və dəqiq məkan məlumatlarını tətbiq üzərindən bütün istifadəçilərə göstərdiyi üçün məxfiliklə bağlı ciddi narahatlıqlarla üzləşib. BlackVue-nin rəsmi mobil tətbiqində dünya xəritəsi üzərində müxtəlif ölkələrdə yerləşən dashcam-ların mövqeyi göstərilir. İstifadəçilər bu nöqtələrin üzərinə toxunaraq həmin kameralardan yayımlanan canlı görüntüləri izləyə bilirlər.

    Araşdırma zamanı ABŞ, Kanada və Avstraliya daxil olmaqla müxtəlif ölkələrdə hərəkətdə olan avtomobillərin canlı görüntülərinə giriş əldə edilib. Tətbiq yalnız avtomobilin yerini deyil, onun hansı küçədə olduğunu və hansı sürətlə hərəkət etdiyini də göstərir. Bundan əlavə, bəzi yayımlarda səs də aktiv olduğundan avtomobildəki söhbətləri dinləmək mümkün olub.

    Sistem park edilmiş avtomobilləri də izləməyə imkan verir. BlackVue-nin “Parking Mode” funksiyası avtomobil dayanmış vəziyyətdə olsa belə kameranın işləməsini davam etdirir və görüntülər tətbiq üzərindən əlçatan qalır. Maraqlı məqamlardan biri isə odur ki, canlı yayımları izləmək üçün BlackVue kamerasına sahib olmaq tələb olunmur. Tətbiqi yükləyən və hesab yaradan istənilən şəxs bu görüntülərə baxa bilir. Pulsuz istifadəçilər üçün gündəlik izləmə müddəti məhdudlaşdırılsa da, ödənişli abunəliklə bu limit aradan qalxır.

    BlackVue daha əvvəl bildirib ki, görüntülər standart olaraq gizlidir və bu funksiyadan istifadə etmək üçün istifadəçinin razılığı tələb olunur. Lakin bəzi istifadəçilər belə bir funksiyanın mövcudluğundan xəbərsiz olduqlarını deyirlər. Mütəxəssislər isə avtomobillərin real vaxtda izlənilməsinin və audio məlumatların paylaşılmasının təhlükəsizlik və məxfilik baxımından risk yarada biləcəyini vurğulayırlar.