Google Avropa İttifaqı məhkəməsinin sayt bloklama qərarına etiraz etdi

    Google Avropa İttifaqında internet saytlarının bloklanması ilə bağlı yeni hüquqi yanaşmaya etiraz edib. Şirkət hesab edir ki, pirat məzmunla mübarizə məqsədilə tətbiq edilən genişmiqyaslı bloklama üsulları qanuni internet xidmətlərinə və adi istifadəçilərə də zərər verə bilər. Məsələ Fransa məhkəməsinin qəbul etdiyi qərardan sonra gündəmə gəlib. Qərara əsasən, idman yayım hüquqlarının sahiblərinin müraciəti əsasında Google və Cloudflare kimi internet infrastrukturunu təmin edən şirkətlərdən pirat yayım və qanunsuz striminq saytlarına girişi məhdudlaşdırmaq tələb olunur.

    Bu qərarın əsas fərqi ondan ibarətdir ki, məsuliyyət birbaşa pirat saytların üzərinə deyil, internetin işləməsində vasitəçi rolunu oynayan xidmət təminatçılarının üzərinə qoyulur. Bunun səbəbi isə pirat platformaların tez-tez domenlərini və serverlərini dəyişməsi, müxtəlif ölkələrdə fəaliyyət göstərməsi və hüquqi məsuliyyətdən yayınmasının daha asan olmasıdır.

    Google bildirib ki, belə bloklamaları həyata keçirmək üçün əsasən DNS filtrlənməsi, IP ünvanlarının və VPN xidmətlərinin bloklanması kimi üsullardan istifadə edilməlidir. Şirkətin fikrincə, bu yanaşmalar effektiv deyil, çünki pirat saytlar alternativ domenlər və DNS xidmətləri vasitəsilə qısa müddətdə fəaliyyətlərini bərpa edə bilirlər.