Kibertəhlükəsizlik startapı Comp AI 34 milyon dollar investisiya aldı

    Kibertəhlükəsizlik və qaydalara uyğunluq sahəsində çalışan “Comp AI” startapı A seriyası üzrə 34 milyon dollar (təxminən 57,8 milyon manat) investisiya alıb. İnvestisiya raunduna “Roo Capital” və “Grand Ventures” rəhbərlik edib. Şirkət indiyədək 37,5 milyon dollar maliyyə cəlb edib. Bu məbləğ təxminən 63,8 milyon manatdır. Yeni vəsait platformanın funksiyalarını genişləndirmək üçün xərclənəcək.

    “Comp AI” ötən ilin yanvarında Lewis Carhart, Claudio Fuentes və Mariano Fuentes tərəfindən yaradılıb. Təsisçilər daha əvvəl 1 milyondan çox istifadəçi toplayan “LeapAI” platformasında birgə çalışıblar. Ancaq davamlı maraq görən istifadə sahəsi tapa bilmədikləri üçün layihə təxminən 2 ildən sonra bağlanıb. Həmin təcrübə onlara böyük dil modelləri ilə işləməyi öyrədib. Eyni zamanda, şirkətlərdə məlumat təhlükəsizliyi qaydalarını yoxlayan SOC 2 prosesinin nə qədər vaxt apardığını göstərib.

    “Comp AI” şirkətlərin təhlükəsizlik və qaydalara uyğunluq işlərini süni intellektlə işləyən agentlərlə avtomatlaşdırır. Bu agentlər təhlükəsizlik qaydalarının ilkin mətnini hazırlayır və audit üçün lazım olan sübutları toplayır. Platforma şirkətin müəyyən edilmiş nəzarət tələblərinə əməl edib-etmədiyini daim izləyir. Ancaq proqram müstəqil auditi əvəz etmir.

    İnsan nəzarəti də prosesin bir hissəsi olaraq qalır. Mütəxəssislər süni intellekt agentlərini işə hazırlayır, nəzarət sistemlərini işlək saxlayır və prosesləri izləyirlər. Agent təhlükəsizlik qaydasının ilkin mətnini yaza bilər, amma son yoxlama və təsdiqi insan edir. Platformada kodu və texniki infrastrukturu təhlükəsizlik boşluqlarına qarşı fəal yoxlayan, süni intellektə əsaslanan penetrasiya testi də var.

    SOC 2 hesabatı bəzən şirkətin yeni müştəri ilə müqavilə bağlaması üçün əsas şərt olur. Ancaq audit başa çatdıqdan sonra sistemə qoşulan yeni süni intellekt agenti müştəri məlumatlarına giriş ala, icazələri dəyişə və ya təhlükəsizlik boşluğu yarada bilər. “Comp AI” belə dəyişiklikləri real vaxtda izləmək üçün ilk növbədə giriş icazələrinə və görülən işlərin qeydə alınmasına diqqət yetirir. Sistem agentin hansı məlumatlara baxdığını, nə etdiyini və müəyyən edilmiş sərhədləri aşıb-aşmadığını yoxlayır.