Massaçusets məhkəməsi nömrəoxuyan kameraların yerini açıqlamağı əmr edib

    Massaçusets ştat məhkəməsinin hakimi qərara alıb ki, polis avtomobil nömrələrini avtomatik oxuyan ALPR sistemlərinin harada yerləşdiyini ictimaiyyətdən gizlədə bilməz. Məhkəmə bu sistemlərlə bağlı qeydlərin dərhal açıqlanmasını tələb edib. Qərar süni intellektlə işləyən “Flock” kameraları ilə bağlı məxfilik mübahisələrinin artdığı bir vaxtda verilib.

    Bu qərarla “ACLU of Massachusetts” təşkilatı ilə Massaçusets Ştat Polisi arasında 3 il davam edən hüquqi mübahisə başa çatıb. Təşkilat 2023-cü ildə polisə qarşı iddia qaldırmışdı. İddiada kameraların harada quraşdırıldığı və polis qurumlarının sürücülər haqqında toplanan məlumatlardan necə istifadə etdiyi barədə sənədlərin açıqlanması tələb olunurdu.

    İddia qaldırılan vaxt ştatın sərəncamında avtomobillərin hərəkətini izləmək üçün toplanmış təxminən 290 milyon qeyd var idi. Polis məlumatların və kameraların yerlərinin niyə açıqlanmamalı olduğunu əsaslandırmağa çalışıb. Hakim isə bu səbəbləri yetərli saymayıb və ALPR qeydlərinin dərhal ictimaiyyətə təqdim olunmasına göstəriş verib.

    ALPR kameraları yoldan keçən avtomobillərin nömrə nişanlarını avtomatik oxuyur. Sistem avtomobilin harada və nə vaxt qeydə alındığını məlumat bazasında saxlayır. Süni intellekt bu məlumatları daha sürətli təhlil etməyə kömək edir. Məxfilik müdafiəçiləri belə geniş şəbəkənin insanların hərəkətini uzun müddət izləmək üçün istifadə oluna biləcəyindən narahatdırlar.

    “Flock” kameralarının sürətlə yayılması ABŞ-nin müxtəlif şəhər və ştatlarında etirazlara səbəb olub. Bəzi icmalar cihazların yerlərini üzə çıxarmağa və onları sıradan çıxarmağa çalışıb. Eyni zamanda, ABŞ-nin hər 2 əsas partiyasından olan siyasətçilər hüquq mühafizə orqanlarının bu sistemlərdən istifadəsini məhdudlaşdıran qanun layihələrini dəstəkləyirlər.

    Missuri senatoru Coş Houli ötən ay “Flock” şirkəti ilə bağlı araşdırmaya rəhbərlik etdiyini açıqlayıb. Bəzi ştatlar məlumat toplama qaydalarını sərtləşdirir və bu özəl texnologiya şirkətinə dövlət vəsaiti ayrılmasını dayandırır. Massaçusetsdə verilən qərar isə ştat polisindən ayrıca ümumştat ALPR şəbəkəsinin fəaliyyətini daha açıq şəkildə göstərməyi tələb edir.